கடலுார்: புதுச்சேரி, பின்னாச்சிகுப்பம் செரின் பெலிகன் வில்லா ஓனர்ஸ் அசோசியேஷனில் நேற்று திருச்சி கல்யாணராமன் ‘நள சரித்திரம்’ என்ற தலைப்பில் பேசியதாவது:

நளன், தமயந்தியை மணந்தார். நளன் தனது காலை சரியாக கழுவாததால், அவரை சனி பிடித்தார். புஷ்கரனோடு சூதாட்டம் ஆடிய நளன் அனைத்தையும் இழந்து காட்டிற்கு சென்றார். மனைவி தமயந்தியையும் பிரிந்தார். தமயந்தி தனது தாய் வீடு சென்றாள். அயோத்தி மன்னனிடம் நளன் தேரோட்டியாக பணியில் சேர்ந்தார்.

பல்வேறு இன்னல்களுக்கு பிறகு தமயந்தியை கண்டுபிடித்தார். இறுதியில் நளன், தமயந்திக்கு காட்சியளித்த சனி பகவான், உனக்கு என்ன வரம் வேண்டுமென, நளனிடம் கேட்டார். சனி பகவானாகிய நீங்கள் மற்றவரை பிடித்திருக்கும்போது, அவர்கள் என் கதையான நள சரித்திரம் கேட்டால் அவர்களை விட்டு விலகிட வேண்டும் என்றார். இதற்கு சனிபகவானும் அருளினார். இதன் மூலமாக பகவான் எனும் நாமத்தை உச்சரித்தால் சனி விலகி விடுவார்.

பணம் தருபவர்கள் எல்லாம் வள்ளல் கிடையாது. யார், யாருக்கு என்ன தேவையோ என்பதை அறிந்து உதவி செய்பவர்களே வள்ளல். மனிதர்களின் கடந்த கால பாவங்கள், புண்ணியங்கள் அடிப்படையில் தான் ஜாதகங்கள் அமைகிறது. பக்தி இல்லையென்றால் நிம்மதி இருக்காது. பலனை எதிர்பார்க்காமல் கடமையை செய்ய வேண்டும். நளச்சரித்திரம் கேட்டால் கஷ்டங்கள் விலகும் என்றார்.