காஞ்சிபுரம்: காஞ்சிபுரம் கச்சபேஸ்வரர் கோவில் நுழைவாயிலில் அமைக்கப்பட்டுள்ள தற்காலிக கடையால், பக்தர்கள் சிரமத்திற்கு ஆளாகி வருகின்றனர்.

கோவிலின் பிரதான வாசலை ஒட்டியுள்ள பகுதியில் வைக்கப்பட்டுள்ள இந்த கடையால், தரிசனத்திற்கு வரும் பக்தர்கள் சிரமப்படுகின்றனர். குறிப்பாக, கூட்ட நெரிசல் அதிகம் உள்ள நாட்களில் முதியோர்களும், குழந்தைகளும் கோவிலுக்குள் சென்று வர மிகுந்த அவதிப்படுகின்றனர். கோவிலின் நுழைவாயில் பகுதியிலேயே கடை அமைக்கப்பட்டுள்ளதால், உள்ளேயும் வெளியேயும் செல்வதில் கடும் நெரிசல் ஏற்படுகிறது. 

இதுகுறித்து, கோவில் செயல் அலுவலர் திவ்யா கூறியதாவது: கோவில் வாசலில் பூ, பழக்கடைகள் உள்ளன. கோவில் சார்பில் குத்தகை விடப்பட்டுள்ள இந்த கடையில், கற்பூரம், நெய்தீபம், அர்ச்சனை பொருட்கள் விற்பனை செய்யப்படுகின்றன. வெளியில் இடம் இல்லாததால் இங்கு தற்காலிகமாக வைக்கப்பட்டுள்ளது. பக்தர்களுக்கு இடையூறு இல்லாமல் மாற்று இடம் விரைவில் ஏற்பாடு செய்யப்படும். இவ்வாறு அவர் கூறினார்.