ராமேஸ்வரம்: ராமேஸ்வரம் கோயில் அக்னி தீர்த்த கரையில் சிமெண்ட் சிலாப் கல்கள் சேதமடைந்து உள்ளதால், பக்தர்கள் அவதிப்படுகின்றனர்.

ராமேஸ்வரம் ராமநாதசுவாமி கோயிலுக்கு தினமும் ஏராளமான பக்தர்கள் வருகின்றனர். பக்தர்கள் முதலில் கோயில் அக்னி தீர்த்த கடல் மற்றும் கோயில் வளாகத்தில் உள்ள 22 தீர்த்தங்களை நீராடி தரிசனம் செய்கின்றனர். இந்நிலையில் அக்னி தீர்த்த கரையை அழகுபடுத்தும் திட்டத்தின் கீழ் மத்திய அரசு வழங்கிய நிதியில் 5 ஆண்டுக்கு முன் ராமேஸ்வரம் நகராட்சி கடற்கரையில் சிமெண்ட் சிலாப் கல்கள் அமைத்தது. இந்த கல்கள் ராட்சத அலையில் காணாமல் போய்விடும் என சமூக ஆர்வலர்கள் தெரிவித்தும் அதிகாரிகள் கண்டு கொள்ளவில்லை. இந்நிலையில் ராட்சத அலையால் சிமெண்ட் சிலாப் கல்கள் சேதமடைந்து கரடுமுரடாக கிடக்கிறது. இதனை கடந்து நீராடச் செல்லும் பக்தர்கள் இடறி விழுந்து காயம் அடைகின்றனர். இந்த சேதமடைந்த கல்களை அகற்றி இயற்கையான கடற்கரை ஏற்படுத்திட பக்தர்கள் பலமுறை வலியுறுத்தியும் அதிகாரிகள் கண்டு கொள்ளவில்லை. இதனால் பக்தர்கள் தொடர்ந்து அவதிப்படுகின்றனர்.