தர்ப்பணம் செய்வதற்கென பல நாட்களை குறிப்பிட்டிருந்தாலும், மாதம்தோறும் அமாவாசையிலாவது தர்ப்பணம் செய்வது அவசியம். சிலர் தை, ஆடி  அமாவாசைகளில் மட்டும் கொடுக்கிறார்கள். ஒருவேளை, இதுவரை பிதுர் தர்ப்பணமே செய்யாமல் இருந்தால், மகாளாய அமாவாசையன்று  அதைத் தொடங்கினால் மிகவும் சிறப்பு. இன்று இரவு 9.53 முதல் நாளை 10ம் தேதி இரவு 9.34 வரை அமாவாசை திதி உள்ளது. நாளை அதிகாலையில் குளித்து, வீட்டை சுத்தம் செய்து முன்னோர்களை மனதில் நினைத்து எள் கலந்த நீரால் தர்ப்பணம் செய்ய வேண்டும். தர்ப்பணத்தின் போது எள், ஜலம், பிண்டம், அரிசி, வாழைக்காய், சாப்பாடு ஆகியவற்றை பயன்படுத்துவர். இவற்றை பிதுர் தேவதைகள்  முன்னோர்களுக்குக் கொண்டு சேர்த்துவிடுவர் என்கிறது சாஸ்திரம். பூலோகத்திற்கு தங்கள் பிள்ளைகளை பார்க்க வந்த முன்னோர்  மீண்டும் பிதுர்லோகத்திற்கு இன்று திரும்புவதாக ஐதீகம். இந்நாளில் தீர்த்தக் கரைகளில் நீராடுவதும், பிதுர் வழிபாடு செய்து அவர்களை வழியனுப்பி வைப்பதும், குடும்பம் செல்வச்செழிப்புடன் வாழவும், வாழையடி வாழையாய் தழைக்கவும் உதவும். ஏழை, எளியோருக்கு அன்னதானம், உடை அல்லது உணவு தானம் செய்யலாம். பசு மற்றும் காக்கைக்கு உணவு வழங்குவது புண்ணியத்தை அதிகரிக்கும்.