மைசூரு: கர்நாடகாவின் புகழ்பெற்ற மைசூரு தசரா விழாவில், 3,473 ட்ரோன்களைப் பயன்படுத்தி வானில் பிரம்மாண்ட மயில் உருவத்தை உருவாக்கி நடனமாடச் செய்த நிகழ்ச்சி கின்னஸ் உலக சாதனை படைத்துள்ளது. மைசூருவின் பன்னிமண்டப் பகுதியில் உள்ள டார்ச்லைட் அணிவகுப்பு மைதானத்தில், அக்டோபர் 18-ம் தேதி இரவு நடைபெற்ற இந்த ட்ரோன் காட்சியில், இந்தியாவின் தேசியப் பறவையான மயில் வானில் தோகை விரித்து ஆடுவது போன்ற காட்சி பார்வையாளர்களை வியப்பில் ஆழ்த்தியது.

வானில் மிளிர்ந்த பிரம்மாண்ட மயில்: பல ட்ரோன்களை ஒருங்கிணைத்து உருவாக்கப்பட்ட இந்த மயில் காட்சி, ட்ரோன்கள் மூலம் உருவாக்கப்பட்ட பறவையின் மிகப்பெரிய வான்வழிக் காட்சி என்ற கின்னஸ் உலக சாதனையைப் பெற்றுள்ளது. சாமுண்டீஸ்வரி மின்சார விநியோகக் கழகம் (CESC) ஏற்பாடு செய்த இந்த நிகழ்ச்சியை போட்லாப் டயனாமிக்ஸ் நடத்தியது.

ஐந்தாவது ஆண்டு ட்ரோன் காட்சி: மைசூரு தசரா விழாவில் ட்ரோன் காட்சிகள் பொதுமக்களிடையே பெரும் வரவேற்பைப் பெற்று வருகின்றன. போட்லாப் டயனாமிக்ஸ் நிறுவனம் 2022-ம் ஆண்டு முதல் தொடர்ந்து இந்த விழாவில் ட்ரோன் காட்சிகளை நடத்தி வருகிறது. இந்த ஆண்டு ஐந்தாவது முறையாக நிகழ்ச்சியை நடத்தியுள்ளது. நிறுவனத்தின் நிறுவனர் மற்றும் நிர்வாக இயக்குநர் டாக்டர் சரிதா அஹ்லாவத் கூறுகையில், அரங்கத்தின் உள்ளேயும் வெளியேயும் திரண்டிருந்த மக்கள் கூட்டம், இந்த நிகழ்ச்சி அனைவரையும் கவர்ந்திருப்பதை வெளிப்படுத்துவதாகத் தெரிவித்தார். இந்தியாவில் தயாரிக்கப்பட்ட ட்ரோன்களைப் பயன்படுத்தி, இந்தியாவின் தேசியப் பறவையான மயிலின் உருவத்தை உலக சாதனையாக உருவாக்கியது கர்நாடக மக்களுக்குப் பெருமை சேர்க்கும் தருணம் என்றும் அவர் குறிப்பிட்டார். 

சமூக வலைதளங்களில் வைரல்; ட்ரோன் நிகழ்ச்சியின் முதல் இரண்டு நாட்களிலும் டார்ச்லைட் அணிவகுப்பு மைதானத்தில் ஏராளமானோர் திரண்டனர். முதல் நாள் நிகழ்ச்சியின் காணொளிகள் சமூக வலைதளங்களிலும் தகவல் பகிர்வு தளங்களிலும் பரவலாகப் பகிரப்பட்டன. தற்போது 3,473 ட்ரோன்களால் உருவாக்கப்பட்ட மயில் காட்சி கின்னஸ் உலக சாதனை படைத்திருப்பது, மைசூரு தசரா விழாவுக்கு மேலும் சிறப்பைச் சேர்த்துள்ளது.