அயோத்தி: தீபாவளியை முன்னிட்டு அயோத்தியில் நடைபெற உள்ள 10-வது தீபோத்ஸவ விழா, பக்தி, பிரம்மாண்டம் மற்றும் நவீனத் தொழில்நுட்பத்தின் சங்கமமாக அமைய உள்ளது. இதையொட்டி, ஸ்ரீராம ஜென்மபூமி வளாகத்தில் ஒரு லட்சத்துக்கும் மேற்பட்ட தீபங்களும், சரயு நதிக்கரையில் உள்ள 56 படித்துறைகளில் 30 லட்சத்துக்கும் அதிகமான அகல் விளக்குகளும் ஏற்றத் திட்டமிடப்பட்டுள்ளது.

தீபங்களை ஏற்றும் பணிகளைச் சிறப்பாக மேற்கொள்ள, ஸ்ரீராம ஜென்மபூமி வளாகம் ஐந்து மண்டலங்களாகப் பிரிக்கப்பட்டுள்ளது. சுமார் 1,000 தன்னார்வலர்கள் இந்தப் பணிகளில் ஈடுபட உள்ளனர்.

மண்டலம் 1 – ஸ்ரீராமர் கோயில் வளாகம்: கருவறை மற்றும் பிரகாரப் பகுதிகளில் 3,000-க்கும் மேற்பட்ட தீபங்கள் ஏற்றப்படும்.

மண்டலம் 2 – குபேர் திலா, சப்த மண்டபம்: இப்பகுதிகளில் 3,000-க்கும் மேற்பட்ட விளக்குகள் ஒளிரும்.

மண்டலம் 3 – வெளியேறும் பாதை, யாத்ரி சுவிதா கேந்திரா: 14,000-க்கும் மேற்பட்ட தீபங்கள் ஏற்றப்படும்.

மண்டலம் 4 – பயணிகள் சேவை மையம், அங்கத் திலா: 13,000-க்கும் மேற்பட்ட அகல் விளக்குகள் வரிசையாக வைக்கப்படும்.

மண்டலம் 5 – ஸ்ரீராம ஜென்மபூமி பாதை, தரிசன வழி: 13,000 தீபங்கள் பக்தர்களை வரவேற்கும் வகையில் ஒளிரும்.

கின்னஸ் சாதனை முயற்சி: ராமர் கோயில் வளாகம் மட்டுமின்றி, சரயு நதிக்கரையிலும் பிரம்மாண்டமான தீப அலங்காரம் செய்யப்பட உள்ளது. நதியின் 56 படித்துறைகள் மற்றும் ராமர் படித்துறையில் 30 லட்சத்துக்கும் அதிகமான அகல் விளக்குகள் ஏற்றி புதிய உலக சாதனை படைக்கத் திட்டமிடப்பட்டுள்ளது. இதற்காக சுமார் 55,000 லிட்டர் எண்ணெய், 65 லட்சம் திரிகள் தயார் செய்யப்பட்டுள்ளன. பல்வேறு பல்கலைக்கழகங்கள் மற்றும் சமூக அமைப்புகளைச் சேர்ந்த 34,000-க்கும் மேற்பட்ட தன்னார்வலர்கள் தீபங்களை அலங்கரித்து ஏற்றும் பணியில் ஈடுபட உள்ளனர்.

தீபோத்ஸவம் 2026: முக்கிய நிகழ்ச்சிகள்

நவம்பர் 7, சனிக்கிழமை சோட்டி தீபாவளி நாளில் முக்கிய நிகழ்ச்சிகள் நடைபெற உள்ளன.

மாலை 5.45 மணி – சரயு மகா ஆரத்தி: 1,100-க்கும் மேற்பட்ட துறவிகள் மற்றும் அர்ச்சகர்கள் இணைந்து மகா ஆரத்தி நடத்த உள்ளனர்.

மாலை 6.30 முதல் 7.15 மணி வரை – தீபம் ஏற்றுதல்: சரயு நதிக்கரையின் படித்துறைகள் மற்றும் கோயில் வளாகம் முழுவதும் லட்சக்கணக்கான தீபங்கள் ஒரே நேரத்தில் ஏற்றப்படும்.

இரவு 7.30 மணி – ட்ரோன் கண்காட்சி: 2,100 இந்தியத் தயாரிப்பு ட்ரோன்கள் மற்றும் 3டி ஹாலோகிராம் தொழில்நுட்பம் மூலம் ராமாயணக் காட்சிகள் வானில் ஒளிரச் செய்யப்பட உள்ளன.

மேலும், தாய்லாந்து, தென்னாப்பிரிக்கா உள்ளிட்ட ஐந்து நாடுகளைச் சேர்ந்த கலைஞர்கள் பங்கேற்கும் சர்வதேச ராம்லீலா நிகழ்ச்சியும் நடைபெற உள்ளது. ராமாயணத்தின் ஏழு காண்டங்களை அடிப்படையாகக் கொண்ட ஏழு அலங்கார ஊர்திகளுடன், முதன்முறையாக சோடஷ சிருங்கார சோபா யாத்திரை நடைபெறுவது விழாவின் மற்றொரு சிறப்பம்சமாகும். அயோத்தி முழுவதும் தீப ஒளியில் ஜொலிக்க உள்ள இந்த விழா, பக்தர்களுக்கு மறக்க முடியாத ஆன்மிக அனுபவமாக அமையும் என எதிர்பார்க்கப்படுகிறது.