மயிலாடுதுறை : மயிலாடுதுறையில் திருவாவடுதுறை ஆதீனத்திற்கு சொந்தமான அபயாம்பிகை சமேத மாயூரநாதர் கோவில் உள்ளது. இந்த கோவிலில் தருமபுரம் ஆதீனத்திற்கு சொந்தமான குமார கட்டளை (முருகன்) சன்னதி தனியாக உள்ளது. இதனை தருமபுரம் ஆதீனம் நிர்வகித்து வருகிறது. முருகன் உற்சவர் சிலை தொடர்பாக திருவாவடுதுறை, தருமபுரம் ஆதீனங்களுக்கு இடையே பிரச்சனை இருந்து வருகிறது. தருமபுரம் ஆதீனம் சார்பில் குமார கட்டளையில் கந்த சஷ்டி விழா ஆண்டுதோறும் சிறப்பாக கொண்டாடப்பட்டு வருகிறது. நேற்று கந்தசஷ்டி விழா தொடக்கத்தையொட்டி முருகன் உற்சவர் சிலையை சிறப்பு பூஜை மற்றும் வீதி உலாவிற்கு தருமபுரம் ஆதீனம் நிர்வாகம் சார்பில் கேட்டபோது துலா உற்சவம் நடப்பதால் விநாயகர், முருகன், சுவாமி, அம்பாள், பஞ்ச மூர்த்திகளுடன் வீதியுலா செல்வது ஐதீகம் என்பதால் மாயூரநாதர் சுவாமியுடன் சேர்ந்து வழக்கம்போல் வீதி உலா செல்லும் என்று திருவாவடுதுறை ஆதீனம் நிர்வாகம் சார்பில் தெரிவிக்கப்பட்டுள்ளது. இதற்கு உடன்பாடு ஏற்படாததால் தருமபுரம் ஆதீனம் கட்டளை விசாரணை ஸ்ரீமத் சுப்பிரமணிய தம்பிரான் சுவாமிகள் செய்தியாளர்களை சந்தித்தபோது கந்த சஷ்டி விழாவிற்கு முருகன் உற்சவர் சிலையை திருவாவடுதுறை ஆதீனம் நிர்வாகம் கொடுக்காமல் நீதிமன்ற உத்தரவை பின்பற்றவில்லை என்று குற்றம் சாட்டினார். தொடர்ந்து தம்பிரான் சுவாமிகள் தலைமையில் தருமபுரம் ஆதீன நிர்வாகத்தினர் மற்றும் ஆதரவாளர்கள் சுவாமி அலங்காரம் செய்யப்பட்ட இடத்திற்கு முன்பு தலையில் அமர்ந்து தர்ணா போராட்டத்தில் ஈடுபட்டனர். தகவல் அறிந்து வந்த இன்ஸ்பெக்டர் செந்தில்குமார் தலைமையிலான போலீசார் இரு தரப்பையும் அழைத்து பேச்சுவார்த்தை நடத்தி நேற்று வழக்கம்போல் விழா தடையின்றி நடக்கட்டும் இன்று பேச்சுவார்த்தை நடத்தி சமூக தீர்வு காண்பது என கூறி முருகன் சிலை தருமபுரம் ஆதீன நிர்வாகத்திடம் ஒப்படைக்கப்பட்டதை அடுத்து கந்த சஷ்டி விழா பூஜைகள் தொடங்கியது. தொடர்ந்து வழக்கம்போல் துலா உற்சவத்தையொட்டி சுவாமி புறப்பாடு நடைபெற்றது.