சிதம்பரம்: உமாபதி சிவாச்சாரியார் சுவாமிகள் திருநட்சத்திர குரு பூஜை விழா கொற்றவன்குடி தோப்பில் நடந்தது. சிதம்பரம் நடராஜர் கோவிலில் தரிசன உற்சவத்திற்கு கவிக்கொடி பாடி உற்சவ கொடி ஏற்றிய உமாபதி சிவாச்சாரியார் சுவாமி திருநட்சத்திரம் குரு பூஜை விழா கொற்றவன்குடி தோப்பு மடத்தில் நேற்று நடந்தது. இதனையொட்டி உமாபதி சிவாச்சாரியாருக்கு சிறப்பு அபிஷேகம், அலங்காரம், தீபாராதனைகள் நடந்தது. இதனைத் தொடர்ந்து ஓதுவார்மூர்த்திகள் பன்னிரு திருமுறை பாடல், மகா தீபாராதனைகள், மகேஸ்வர பூஜை ஆகியவை நடந்தது. நிகழ்ச்சிக்கு விருத்தாசலம் குமாரதேவர் மடம் குருமகா சன்னிதானம் கல்யாணசுந்தர சிவப்பிரகாச பரம்மாச்சாரியார் சுவாமிகள் தலைமையில் சிதம்பரம் மவுனமடம் மடாதிபதி சுந்தரமூர்த்தி சுவாமிகள் முன்னிலையில் சிறப்பு பூஜைகள் நடந்தது. குருபூஜையில் நெய்வேலி முனைவர் இளையஞானி, அண்ணாமலை பல்கலைக்கழக நூலகர் ஆறு வீரப்பனார், வி.எஸ்.டி டிரஸ்ட் மேலாளர் சேது சுப்ரமணியன், சைவ சித்தாந்த வகுப்பு அமைப்பாளர் அருணாசலம், சரவணன், நடராஜன் உள்ளிட்ட முக்கிய பிரமுகர்கள் உட்பட பலர் பங்கேற்றனர். மதியம் பக்தர்கள் அனைவருக்கு அன்னதானம் வழங்கப்பட்டது.