ஸ்ரீபெரும்புதூர்: ஸ்ரீபெரும்புதூர், ஆதிகேசவப் பெருமாள் மற்றும் பாஷ்யகார சுவாமி கோவிலில், இன்று திருத்தேர் உற்சவம் நடைபெற உள்ளது. ஸ்ரீபெரும்புதூரில், ஆதிகேசவப் பெருமாள் மற்றும் பாஷ்யகார சுவாமி கோவில் உள்ளது. இக்கோவிலில், சித்திரை பிரம்மோற்சவ விழா, கடந்த 24ம் தேதி, கொடியேற்றத்துடன் துவங்கியது. அதைத் தொடர்ந்து, முதல் 10 நாட்கள் வரை, ஆதிகேசவப் பெருமாளுக்கு உற்சவமும், அடுத்த பத்து நாட்கள் ராமானுஜர் உற்சவமும் நடைபெறுகிறது. 6ம் நாள் விழாவான நேற்று காலை, சூர்ணாபிஷேகம் வாகனத்தில் சுவாமி எழுந்தருளி பக்தர்களுக்கு காட்சி அளித்தார். ஸ்ரீதேவி, பூதேவியுடன் ஆதிகேசவப் பெருமாள் எழுந்தருளி அருள்பாலித்தார். இன்று, பிரபல உற்சவமான ஆதிகேசவப் பெருமாள் திருத்தேர் உற்சவம் நடைபெறும். இதையொட்டி, காலை 7:00 மணிக்கு, திருத்தேர் புறப்பாடும், இரவு, புஷ்ப பல்லக்கு உற்சவமும் நடைபெற உள்ளது.