பழநி : பழநி கோயிலில் இரண்டாம் "ரோப்கார் வடிவமைப்பு குறித்து கமிட்டியினர், வெளிநாட்டு வல்லுனர்களுடன் ஆலோசனை நடத்தியுள்ளனர். முதல் ரோப்காரின் அருகிலேயே இரண்டாம் ரோப்கார், பல கோடி ரூபாய் செலவில் நிறுவ ஏற்பாடுகள் நடக்கிறது. இதற்காக அரசு 11 பேர் கொண்ட கமிட்டி அமைத்துள்ளது. 2வது ரோப்காருக்கு, ஆஸ்திரியாவைச் சேர்ந்த டாபுல்மேர் மற்றும் கோல்கட்டா கான்வேயர் ரோப்வே சர்வீஸ் மற்றும் பிரான்ஸ்சைச் சேர்ந்த கோமா என்ற நிறுவனமும் இணைந்து, ஒப்பந்தப்புள்ளி கோரியுள்ளன. அந்நிறுவனத்தைச்சேர்ந்த, வல்லுனர்களுடன், கமிட்டி உறுப்பினர்கள் ஆலோசனை கூட்டம் பழநியில் நடந்தது. இந்துஅறநிலைத்துறை கூடுதல் ஆணையர் ராஜா தலைமை வகித்தார். இதில், வெளிநாடுகளில் எவ்விதம் ரோப்கார் இயக்கப்படுகிறது. அதன் நவீன தொழிற்நுட்பங்கள், அதன் வாழ்நாள், பராமரிப்பு விபரங்கள் மற்றும் பக்தர்களின் பாதுகாப்பு போன்றவை குறித்து விரிவாக விவாதிக்கப்பட்டது. இதுப்பற்றி இணைஆணையர்(பொ) ராஜமாணிக்கம் கூறுகையில்," இரண்டாவது ரோப்காருக்காக, ஒப்பந்தபுள்ளி கோரியுள்ள இரண்டு நிறுவன ரோப்வே வல்லுநர்களுடன், கமிட்டி உறுப்பினர்கள் ஆலோசனை நடத்தியுள்ளனர். ஒரு மணி நேரத்திற்கு 1200 பேர் வரை, பயணம் செல்லும் வகையில் புதிய ரோப்கார் வடிவமைக்கப்படவுள்ளது. இதன் அறிக்கையை ரோப்கார் கமிட்டியினர், சென்னை ஆணையரிடம் அளிக்கவுள்ளனர், என்றார்.