ஆமை புகுந்த வீடு உருப்படாது என்பார்கள். ஆனால், கோயில் மூலஸ்தானத்திலுள்ள ஆமையை மக்கள் கூர்மப்பெருமாளாக வழிபடுகின்றனர். கிருதயுகத்தில் வாழ்ந்த ஸ்வேதசக்கரவர்த்தி, மகாவிஷ்ணுவின் தரிசனம் வேண்டி தவமிருந்தான். அவன் முன் தோன்றிய நாரதர், மகாவிஷ்ணுவை கூர்மாவதார மந்திரம் சொல்லி வழிபடும்படி கூறினார். அதன்படி வழிபட்ட மன்னனுக்கு, சுவாமி கூர்ம அவதார கோலத்தில் காட்சி தந்தார். மகிழ்ந்த மன்னன் தான் பார்த்த ஆமை வடிவத்தை சிலையாக்கி கோயில் எழுப்பினான். இந்த தலம் ஆந்திர மாநிலம், ஸ்ரீகாகுளம் மாவட்டத்தில் கூர்மம் என்ற ஊரில் உள்ளது. மூலஸ்தானத்தில் ஆமை வடிவம் உள்ளது. இதற்கு மஞ்சள் காப்பிட்டு பூஜை செய்கின்றனர். ஆமையின் முன்புறம் நாமமும், பின்பகுதியில் சுதர்சன சக்கரமும் உள்ளது. இரு கொடி மரங்களுடன் அமைந்த தலம் இது. கோயில் அருகில் ஸ்வேத புஷ்கரிணி தீர்த்தம் உள்ளது. இங்குள்ள ஒரு தடாகத்தில் வளரும் ஆமையை பக்தர்கள் வணங்கிச் செல்கின்றனர்.