தர்மபுரி: சங்கடஹர சதுர்த்தியை முன்னிட்டு, தர்மபுரி, கிருஷ்ணகிரி மாவட்டங்களில் உள்ள விநாயகர் கோவில்களில் நேற்று சிறப்பு பூஜை நடந்தது. சங்கடஹர சதுர்த்தியை முன்னிட்டு, தர்மபுரி எஸ்.வி.,ரோடு சாலை விநாயகர் கோவிலில், நேற்று அதிகாலை, 6:00 மணிக்கு சிறப்பு அபிஷேகம், பூஜை நடந்தது. மூலவருக்கு வெள்ளி கவசம் சாத்தப்பட்டு, சிறப்பு அலங்காரத்தில் பக்தர்களுக்கு அருள்பாலித்தார். இதேபோல், இலக்கியம்பட்டி சித்தி விநாயகர் கோவில், அன்னசாகரம் கோடி விநாயகர் கோவில், வெண்ணாம்பட்டி ரயில்வே கேட் குபேர கணபதி கோவில், நெசவாளர் காலனி சக்திவிநாயகர் கோவில், பாலக்கோடு பால்வண்ணநாதர் கோவில், காரிமங்கலம் ராஜகணபதி கோவில் உட்பட, மாவட்டத்தின் பல்வேறு விநாயகர் கோவில்களில், சங்கடஹர சதுர்த்தியை முன்னிட்டு, நேற்று சிறப்பு பூஜை நடந்தது. இதேபோல், கிருஷ்ணகிரி சப்ஜெயில் ரோடு ஸ்ரீவர சித்தி விநாயகர் கோவிலில், நேற்று மாலை, 6:00 மணிக்கு, 201 குடம் பால் அபி?ஷகம் நடந்தது. 7:00 மணிக்கு வரசித்தி விநாயகருக்கு சிறப்பு மஞ்சள் அலங்காரம் செய்யப்பட்டது. இந்த நிகழ்ச்சியில் ஏராளமான பெண்கள் நெய் தீபம் ஏற்றி விநாயகரை வழிபட்டனர்.