திருத்தணி : கங்கையம்மன் கோவிலில், நேற்று நடந்த ஜாத்திரை விழாவில், திரளான பக்தர்கள் கலந்து கொண்டு வழிபட்டனர்.திருத்தணி ஒன்றியம், பாகவதபுரம் கிராமத்தில், நேற்று கங்கையம்மன் ஜாத்திரை திருவிழா நடந்தது.

விழாவை ஒட்டி, காலை, 8:30 மணிக்கு, கங்கையம்மன் மற்றும் சக்தியம்மன் கோவில் வளாகத்தில், கூழ் வார்த்தல் நிகழ்ச்சி நடந்தது. தொடர்ந்து, மூலவர் அம்மனுக்கு சிறப்பு அபிஷேகம், அலங்காரம் மற்றும் தீபாராதனை நடந்தன. மாலை, 4:00 மணி முதல் 6:00 மணி வரை கோவில் வளாகத்தில் திரளான பெண்கள் பொங்கல் வைத்து, வழிபட்டனர்.

தொடர்ந்து, இரவு, 7:30 மணிக்கு பூ கரகத்துடன், களி மண்ணால் செய்யப்பட்ட கங்கையம்மன் சிறப்பு அலங்காரத்தில் வீதியுலா வந்து பக்தர்களுக்கு அருள்பாலித்தார்.

இதையடுத்து, கும்பம் கொட்டும் நிகழ்ச்சியும், இரவு நாடகமும் நடந்தது. ஜாத்திரை விழாவில், சுற்றியுள்ள கிராமங்களில் இருந்து திரளான பக்தர்கள் பங்கேற்று, அம்மனை தரிசித்தனர். இதற்கான ஏற்பாடுகளை கிராமவாசிகள் செய்திருந்தனர்.