ஸ்ரீவில்லிபுத்துார், தமிழக அரசின் இந்துசமய அறநிலையத்துறையின் கீழ் மாவட்டத்தின் ஒவ்வொரு தாலுகாவிலும் இருக்கும் கோயில்களை பற்றிய முழு விபரங்களை, அனைவரும் தெரிந்து கொள்ளும் வகையில், விருதுநகர் மாவட்ட திருக்கோயில்கள் வழிகாட்டி புத்தகம் வெளியிடப்பட்டுள்ளது. மாவட்டத்தில் ஸ்ரீவில்லிபுத்துார் ஆண்டாள்கோயில், திருவண்ணாமலை பெருமாள் கோயில், மடவார்வளாகம் வைத்தியநாதசுவாமி கோயில், ராஜபாளையம் மயூரநாதசுவாமி, தேவதானம் நச்சாடை தவிர்த்தருளியசுவாமி, சிவகாசி விஸ்வநாதசுவாமி, திருத்தங்கல் நின்றநாராயணப்பெருமாள், இருக்கன்குடி மாரியம்மன், விருதுநகர் சொக்கநாதசுவாமி, அருப்புகோட்டை அமுதவல்லி கோயில், திருச்சுழி திருமேனிநாதசுவாமி கோயில் என ஒவ்வொரு தாலுகாவிலும் பிரபல கோயிலை அப்பகுதி மக்கள் அறிந்திருப்பார்கள்.

சிறப்பு பூஜை விபரம்: அத்தகைய கோயில்களின் தலவரலாறு, திருவிழாக்கள், சிறப்பு பூஜை விபரங்கள் என பல தகவல்களை பெரும்பாலானோர் முழுவிபரங்களை அறிந்திருப்பதில்லை. இந்நிலையில் விருதுநகர் மாவட்ட இந்து சமய அறநிலையத்துறையின் கீழ் 42 கோயில்கள் மிகவும் புராதானமிக்க கோயில்கள் என்பது மிகவும் ஆச்சரியப்படவேண்டிய விஷயம். இந்த கோயில்கள் என்னென்ன என்பதை நாம் ஒவ்வொருவரும் தெரிந்து சுவாமி தரிசனம் செய்யவேண்டும்.

42 கோயில்கள்: மாவட்டத்தின் வடகிழக்கு பகுதியான திருச்சுழி முதல் தென்மேற்கு பகுதியான தேவதானம் வரை 42 கோயில்கள் குறித்த விபரங்களை நுாறு பக்க புத்தகமாக தொகுத்து அனைத்து விபரங்களையும் தந்துள்ளது விருதுநகர் மாவட்ட இந்துசமய அறநிலையத்துறை. இப்புத்தகத்தில் ஒவ்வொரு கோயில்களின் அமைவிடம், தலவரலாறு, தனி சிறப்பு, கல்வெட்டு தகவல்கள், நடை திறக்கும் நேரம், முக்கிய திருவிழாக்கள் விபரம், பஸ் போக்குவரத்து, பக்தர்கள் தொடர்பு கொள்ள தொலைபேசி எண், இமெயில் முகவரிகள், தினசரி பூஜை விபரங்கள் என பல்வேறு தகவல்கள் தெரிவிக்கபட்டுள்ளது. இப்புத்தகம் ஒவ்வொரு கோயிலிலும் விற்பனைக்கு உள்ளது.