ஐயப்பனை வளர்த்த பந்தள அரச குடும்பத்தைச் சேர்ந்தவர்கள் இப்போதும் சபரிமலை வருவார்கள். அதில் சில சுவையான தகவல்கள்.

பந்தள அரச குடும்பம் நமது பாண்டி நாட்டு அரச குடும்பத்தைச் சார்ந்தது. மதுரையை நாயக்கர்கள் ஆண்ட போது சில காரணங்களுக்கு பயந்து புலம் பெயர்ந்து சென்றவர்களே பின்னர் கேரள மாநிலம் பந்தளத்தில் அரசாட்சி செய்தனர். பந்தள மன்னர்கள் மதச்சார்பின்மையை கடைப்பிடித்தனர். மற்ற மதத்தினருக்கு தாராளமாக தங்கள் ஆட்சியில் நிதி உதவிகள் செய்தனர்.

திப்பு சுல்தான் படையெடுப்பை தடுத்து நிறுத்தி பந்தளத்தை காத்த திருவாங்கூர் மன்னர்களுக்கு, படைச் செலவுக்கு பணம் கட்ட வழியில்லாது ஒரு காலத்தில் சபரிமலை வருவாயை ஈடு கொடுத்துள்ளனர் பந்தள மன்னர்கள்.

திருவாங்கூர் சமஸ்தானத்தோடு பந்தள ராஜ்யம் கி.பி. 1820- ல் இணைந்தது. சபரி மலைக்கு வர முடியாத மகளிர் கேரளம், செங்கணாசேரி அருகே உள்ள சிரம்பிக்கல் அரண்மனையில் மண்டல, மகர பூசை காலத்தில் திருவாபரணத்தை தரிசனம் செய்வர். அவர்களுக்கு மன்னர் விபூதி வழங்குவார்.

பந்தள அரச குலத்தின் மூத்த மன்னர் சபரிமலைக்கு வர மாட்டார். அரச குடும்பத்தின் ஆண்கள் உபநயனத்திற்கு முன்பு சபரிக்கு வரமாட்டார்கள். பெண்கள் எப்போதுமே வருவதில்லை.

அரச குடும்பத்தினர் சன்னதிக்கு நேராக நின்று தரிசனம் செய்வதில்லை. பந்தள குடும்பத்தினருக்கு பதினெட்டுப் படி ஏற இருமுடி அவசியமில்லை. அவர்கள் இருமுடி கொண்டு வருவதுமில்லை.  மகர விளக்கின் போது ஆபரணங்களுடன் பந்தளத்தின் ராஜா வருவார். ஆனால் பம்பையிலேயே தங்கி விடுவார்.  மகர விளக்கு முடிந்த மூன்றாம் நாள் மன்னர் சன்னதிக்கு வருவார். அவரை சரங்குத்தி பகுதியில் கோயில் நிர்வாகிகள் வரவேற்று ஊர்வலமாக அழைத்து வருவார்கள்.

மேல்சாந்தி வரவேற்க, மன்னர் பதினெட்டுப் படி ஏறி வருவார். மாளிகபுரம் அருகே உள்ள ராஜமண்டபத்தில் மன்னர் தங்குவார். மறுநாள் மன்னர் சன்னதியில் சிறப்பு பூஜைகளில் கலந்து கொள்ளுவார். மேல்சாந்தி, தந்திரி ஆகியோருக்கு மன்னர் பரிசுகள் வழங்குவார். பூஜைகள் முடிந்த பின் மன்னர் சன்னதி அருகே தனி அறையில் தங்குவார். அடுத்த நாள் காலை மன்னரிடம் திருவாபரணங்கள் ஒப்படைக்கப்படும்.

ஆபரணங்களைப் பெற்றுக்கொண்ட மன்னர் அரண்மனைக்குக் கிளம்புமுன் சன்னதியின் உள்ளே செல்வார். அப்போது எல்லோரும் சன்னதியை விட்டு வெளியே வந்துவிடுவார்கள். ஐயப்பனும் பந்தள மன்னரும் மட்டும் சன்னதியில் இருக்கும் நேரம் உருக்கமானது. பந்தள பரம்பரைக்கும் ஐயப்பனுக்கும் மட்டுமே உரித்தான சொந்த தருணங்கள் அவை.

சிறிது நேரத்தில் பின் மேல்சாந்தி வந்து மன்னரின் உத்தரவைப் பெற்று கோயிலை மூடுவார். மன்னர் இறங்கி வந்ததும் பதினெட்டாம் படியும் மூடப்படும். சபரிமலையின் மண்டல, மகர விளக்கு பூஜைகளுக்கான சீசன் முடிவுக்கு வரும்.