பதிவு செய்த நாள்
12
பிப்
2018
01:02
மீனாட்சி அம்மன் கோயிலில் மங்கள இசையை 24 மணி நேரமும் ஒலிக்கச் செய்து தெய்வங்களை சாந்தப்படுத்த வேண்டும். மங்கள இசை பக்தர்களின் மனதில் மென்மையான ஆன்மிக உணர்வை ஏற்படுத்தும். கோயிலில் துாய்மை பணிகளை விரைந்து மேற்கொள்ள வேண்டும். தற்போது இது போன்ற ஒரு கோயிலை உருவாக்க முடியாது. அதனால், முன்னோர்கள் உயிரை கொடுத்து உருவாக்கிய கோயிலை உயிர் போல காக்க வேண்டும். மதுரையில் இது போல பாரம்பரிய பெருமை பேசும் கோயில்கள் பல உள்ளன. அந்த கோயில்களையும், மீனாட்சி அம்மன் கோயிலின் துணை கோயில்களையும் முறையாக பராமரிக்க, பாதுகாக்க அறநிலையத்துறையினர் நடவடிக்கை எடுக்க வேண்டும்.-பொ.பொன்காவியா, மாணவி, மதுரை
குறையும் ஆன்மிக உணர்வு: மீனாட்சி அம்மன் கோயில் ஐந்தாண்டுகளில் பெரிய சுற்றுலா தலமாக மாறி விட்டது. இதனால், ஆன்மிக உணர்வு குறைந்து கொண்டே வருகிறது. கோயிலில் உள்ளூர் பக்தர்களை மதிப்பது இல்லை. சுவாமிகளை தரிசிக்க வெளிநாட்டு, வெளிமாநில பக்தர்களுக்கு மட்டும் தான் முன்னுரிமை அளிக்கப்படுகிறது. இதை கோயில் நிர்வாகம் கவனிக்க வேண்டும். ஆகம விதிகளை முறையாக பின்பற்றி, கோயில் வளாகத்தை துாய்மையாக பாதுகாக்க வேண்டும். ஆடி வீதிகளில் குப்பை சிதறி கிடப்பதை ஊழியர்கள் அகற்றுவதில்லை. பக்தர்களும் கோயிலுக்கு வருகிறோம் என்ற உணர்வுடன் உடல் மற்றும் மன துாய்மையுடன் வந்து சென்றால் நல்லது. -ஆர்.கஸ்துாரி, குடும்பத் தலைவி, மதுரை
நெய் தீபம் ஏற்றலாமே: உலக அதிசயமாக கருதப்படும் மதுரை மீனாட்சி அம்மன் கோயிலுக்கு வரும் சுற்றுலா பயணிகளின் எண்ணிக்கை அதிகரித்து வருகிறது. அதற்கு ஏற்ப வசதிகள் செய்யப்பட்டுள்ளனவா என்றால் சந்தேகம் தான். பாதுகாப்பு முன்னேற்பாடுகளை கோயில் நிர்வாகம் செய்திருந்தால் தீ விபத்து நடந்திருக்காது. மேலும் தற்போது எல்லா கோயில்களிலும் சூடம் ஏற்றுவது தவிர்க்கப்படுகிறது. அதுபோல மீனாட்சி அம்மன்கோயிலில் பக்தர்கள் நெய் தீபம் ஏற்ற அறிவுறுத்திட வேண்டும். பக்தர்களும் கோயிலுக்கு செல்கிறோம் என்ற பயபக்தியுடன் சென்று வர வேண்டும். கடைகளை அகற்றுவது வரவேற்கத்தக்கது.
-வி.சசிகலா தேவி, குடும்பத்தலைவி, மதுரை
மதுரை மீனாட்சி கோயில் நமது பொக்கிஷம். இக்கோயிலை இயற்கை சீற்றம், விபத்துக்கள், சுற்றுச்சூழல் மற்றும் சுகாதார சீர்கேட்டில் இருந்து காப்பது நம் கடமை. மீனாட்சி கோயிலின் பழம்பெருமை, புராதனம் காக்க விரும்பும் வாசகர்கள், பல்துறை வல்லுனர்கள் அதற்கான ஆலோசனைகளை மீனாட்சி கோயிலை காப்போம், தினமலர், டி.வி.ஆர்., ஹவுஸ், தினமலர் அவென்யூ, மதுரை 625 016 என்ற முகவரிக்கு தங்கள் புகைப்படத்துடன் அனுப்பலாம். mdureporting@dinamalar.in