தஞ்சாவூர்: கும்பகோணம் மகாமக குளத்தில், வரும்,19ல் மாசிமக தீர்த்தவாரி நடக்கிறது.ஒவ்வொரு ஆண்டும் மாசி மாதம், மக நட்சத்திரத்தன்று, மாசிமக விழா கொண்டாடப்படுவது வழக்கம்.

இவ்விழா, 12 ஆண்டுகளுக்கு ஒருமுறை மகாமக விழாவாக, கொண்டாடப்படுகிறது.ஆண்டு தோறும், மாசிமக விழாவில் சிவாலயங்கள், வைணவத் தலங்களில் கொடியேற்றி, 10 நாள் உற்சவம் நடை பெறும்.இதையடுத்து மகாமகம் தொடர்புடைய ஆதிகும்பேஸ்வரர் கோவில், காசிவிஸ்வநாதர்கோவில், காளகஸ்தீஸ்வரர் கோவில், சோமேஸ்வரர்கோவில், அபிமுகேஸ்வரர் கோவில் உள்ளிட்ட சிவாலயங்களில், வரும்,10ல் கொடியேற்றத்துடன் விழா துவங்குகிறது.வரும் 19ம் தேதி மகாமக குளத்தில், பகல், 12:00 மணி முதல், 1:00 மணிக்குள் தீர்த்தவாரியும் நடைபெறவுள்ளது.வைணவத் தலங்களில் முதன்மையானதாக விளங்கும், சக்கரபாணி கோவில், ராஜகோபாலசுவாமிகோவில், ஆதிவராக பெருமாள் கோவில்களில், 11ல், 10 நாள் உற்சவம் கொடியேற்றத்துடன் துவங்குகிறது. 19ம் தேதி காலை, 7:00 மணிக்கு சக்கரபாணி கோவிலில் தேரோட்டம் நடக்கிறது.

பின், 12 மணிக்கு காவிரி ஆற்றில், சக்கரப் படித்துறையில் வைணவக் கோவில்கள் சார்பில் தீர்த்தவாரி நடைபெறவுள்ளது.மோட்டார் மூலம் தண்ணீர்:இந்தாண்டு மகாமக குளத்திலும், பொற்றாமரைக்குளத்திலும் பக்தர்கள் நீராடுவதற்கு போதியளவு தண்ணீர் தேங்கியுள்ளது.ஆனால், காவிரி ஆற்றில் தண்ணீர் இல்லை. கடந்த ஆண்டை போல், காவிரியில் மின்மோட்டார் மூலம் நீராட வசதி செய்து தர வேண்டும் என பக்தர்கள் மாவட்ட நிர்வாகத்துக்கு வேண்டுகோள் விடுத்துள்ளனர்.