ஈரோடு: மாவட்டத்தில் உள்ள வழிபாட்டு ஸ்தலங்களில், பின்பற்ற வேண்டிய நெறிமுறை குறித்த கூட்டம், ஈரோட்டில் நேற்று நடந்தது. எஸ்.பி., சக்தி கணேசன் முன்னிலை வகித்தார். தலைமை வகித்த டி.ஆர்.ஓ., கவிதா பேசியதாவது: மாவட்ட அளவில், 14 கோவில்களில் நேற்று முதல் பக்தர்கள் தரிசனத்துக்கு அனுமதி வழங்கப்படவில்லை. ஆகம விதிப்படி பூஜை தொடரும். அதுபோல, சர்ச், பள்ளிவாசலில் தொழுகை, வழிபாட்டை குறைவான நபர்கள் மூலம், குறைந்தபட்ச நேரத்தில் மேற்கொள்ள வேண்டும். தேசிய அளவில் இதுபோன்ற வழிமுறை பின்பற்றப்படுகிறது. கொரோனா பாதிப்பு சீராகும் வரை ஒத்துழைப்பு தர வேண்டும். அனைத்து வாரச்சந்தை, கால்நடை சந்தைகள் மூடப்பட்டுள்ளன. திருமணம் உள்ளிட்ட நிகழ்ச்சிகளுக்காக பதிவான மண்டப அனுமதி ரத்து செய்யப்பட்டுள்ளது. மணமக்கள் வீடுகளிலேயே பேசி, குறைவான கூட்டத்துடன் நிகழ்ச்சியை நடத்த கேட்டுள்ளோம்.