மானாமதுரை : சதாசிவ பிரம்மேந்திரர் சன்னிதியில், சிவகங்கை கலெக்டர் ஜெயகாந்தன், நேற்று சிறப்பு பிரார்த்தனை செய்தார். சிவகங்கை மாவட்டம், மானாமதுரை ஆனந்தவல்லி சோமநாதர் கோவிலில், ஜோதி வடிவில் ஜீவ சமாதி அடைந்த மகானும், கர்நாடக இசை கலைஞர்களின் குருவாக போற்றப்படு பவருமான, சதாசிவ பிரம்மேந்திரர் ஆராதனை தினம் நேற்று நடந்தது. ஆண்டுதோறும், ஏராளமான கர்நாடக இசை கலைஞர்கள் கூடி, சதாசிவ பிரம்மேந்திரருக்கு, மூன்று நாட்கள் இசை அஞ்சலி செலுத்துவது வழக்கம். இந்த ஆண்டு, கொரோனா தொற்று பரவலால், ஆராதனை விழா நடைபெறவில்லை. ஆராதனை விழா பற்றியும், பிரம்மேந்திரர் பற்றியும் கேள்விப்பட்ட கலெக்டர் ஜெயகாந்தன், நேற்று அவர் சன்னிதியில் சிறப்பு பிரார்த்தனை செய்தார்.கொரோனா வைரஸ் தொற்று முற்றிலும் இல்லாத சிவகங்கையில், மீண்டும் பரவாமல் இருக்க வேண்டி, வழிபாடு செய்தார்.