மேல்மருவத்துார் : ஆதிபராசக்தி சித்தர் பீடத்தில், பங்காரு அடிகளார் பிறந்தநாள் விழா நேற்று கோலாகலமாக நடைபெற்றது. இதில், செவ்வாடை அணிந்து, ஏராளமான பக்தர்கள் பங்கேற்றனர்.

செங்கல்பட்டு மாவட்டம், மேல்மருவத்துார், ஆதிபராசக்தி சித்தர் பீடத்தில், பங்காரு அடிகளார் பிறந்த நாள் விழா, நேற்று, நடைபெற்றது. அதிகாலை, 3:00 மணிக்கு, ஆதிபராசக்தி அம்மனுக்கு சிறப்பு அபிஷேகம் நடைபெற்றது. பெற்றோர் படங்களுக்கு தீபாராதனை காட்டி, பங்காரு அடிகளார் வழிபட்டார்.மலர் அலங்கார ரதத்தில், பங்காரு அடிகளார், சித்தர் பீடத்திற்கு அழைத்து வரப்பட்டார். அப்போது, செவ்வாடை அணிந்த பக்தர்கள், ஓம்சக்தி, பராசக்தி என்ற கோஷங்களை எழுப்பினர். இதில், பல்வேறு மாவட்டங்களைச் சேர்ந்த பக்தர்கள், ஊர்வலமாக வந்தனர். பின், கருவறைக்கு சென்று, சுயம்பு அன்னை, ஆதிபராசக்தி அம்மனை, அடிகளார் வழிபட்டார். அதன் பின், பிறந்த நாள் கேக் வெட்டினார்.சிறப்பு அலங்கார மேடையில், பங்காரு அடிகளார் அமர்ந்து, செவ்வாடை பக்தர்களுக்கு அருள் தரிசனம் கொடுத்தார். ஆதிபராசக்தி ஆன்மிக இயக்க தலைவர் லட்சுமி பங்காரு அடிகளார் முன்னிலை வகித்தார்.சென்னை உயர் நீதிமன்ற நீதிபதி டீக்காராமன், ஒய்வு பெற்ற நீதிபதிகள் தணிகாசலம், முருகேசன், மூத்த வழக்கறிஞர் கனகராஜ் உட்பட பலர் பங்கேற்றனர்.தமிழகம் மட்டும் இன்றி, வெளி மாநிலங்களைச் சேர்ந்த ஏராளமான செவ்வாடை பக்தர்கள், நிகழ்ச்சியில் பங்கேற்றனர். விழா ஏற்பாடுகளை, ஆதிபராசக்தி ஆன்மிக இயக்கம் மற்றும் சேலம், நாமக்கல் மாவட்டங்களின், ஆதிபராசக்தி வழிபாட்டு மன்றத்தினர் செய்திருந்தனர்.