அருப்புக்கோட்டை: விருதுநகர் மாவட்டம் செங்குன்றாபுரத்திற்கு, வடக்கே ஒரு கிலோ மீட்டர் தூரத்தில் உள்ள கிராமம் எல்லிங்க நாயக்கன்பட்டி. இங்குள்ள முருகன் கோயிலில் பழைய கல்வெட்டுகள் இருப்பதாக வந்த தகவலை அடுத்து, பாண்டியநாடு பண்பாட்டு மைய வரலாற்று ஆர்வலர்கள் அருப்புக்கோட்டை ஸ்ரீதர், மதுரை அருண், அழகப்பா பல்கலைக்கழக கல்வெட்டு ஆய்வாளர் தாமரைக்கண்ணன் கள ஆய்வு செய்தனர். அதில் கோவிலின் வெவ்வேறு பகுதிகளில் இருந்த 15 துண்டு கல்வெட்டு கண்டுபிடிக்கப்பட்டது. ஆய்வாளர் ஸ்ரீதர், "இந்த கோவில் பிற்கால பாண்டியர்களின் காலத்தில் கட்டப்பட்டது. முருகன் கோவில் அமைக்கும் வழக்கம் 700 ஆண்டுகளுக்கு முன்பே இருந்துள்ளது. இந்த கோயிலில் 15 கல்வெட்டுகள் காணப்படுகிறது. இவை அனைத்தும் ஒரே கல்வெட்டாக இருந்திருக்கவேண்டும். பராமரிப்பின்றி சேதமடைந்துள்ளது. கோவிலை சீரமைக்கும் போது கல்வெட்டுகள் இடம் மாறி போயிருக்கும். இந்த கல்வெட்டுகளில் அரசரின் பெயர் இல்லை. ஒரு கல்வெட்டில் மட்டும் திரிபுவன சக்கரவர்த்திகள் என்று உள்ளது. அடுத்தடுத்த எழுத்துக்கள் சிதைந்து உள்ளதால் எந்த அரசர் என்று அறிய முடியவில்லை. இந்த கோயிலுக்கு நிலதானம் கொடுத்ததையும் கோயிலுக்கு கோயில் நிலங்கள் இறையிலியாக மாற்றப்பட்டதும் சொல்லுகிறது. கல்வெட்டுகளில் உள்ள எழுத்துகள் அமைப்பை பார்க்கும் போது பிற்கால பாண்டியர் கல்வெட்டு என்று உறுதியாக கூறமுடியும். கோவில் 13ஆம் நூற்றாண்டைச் சேர்ந்தது. இது போன்ற பல கோயில்கள் பல கிராமங்களில் உள்ளன. இவற்றை ஆய்வு செய்தால் பல முக்கிய தகவல்கள் கிடைக்கும்." என்றார்.