சூலூர்: சூலூர் வட்டாரத்தில், சேவா பாரதி சார்பில், தினமும், 10 ஆயிரம் பேருக்கு கபசுர குடிநீர் வழங்கப்படுகிறது.

சூலூர் வட்டார ஆர்.எஸ்.எஸ்., மற்றும் சேவா பாரதி அமைப்பு சார்பில், நோய் எதிர்ப்பு சக்தி தரும், கபசுர குடிநீர் மற்றும் ஆர்செனிக் ஆல்பம் 32 சி என்ற ஹோமியோபதி மாத்திரைகள் கடந்த, 15 நாட்களாக, பல கிராமங்களில் வழங்கப்பட்டு வருகிறது. இந்த அமைப்புகளுடன், சுவாமி விவேகானந்தர் இளைஞர் சக்தி இயக்கம், பள்ளபாளையம் ராமகிருஷ்ண ஆசிரமம், பா.ஜ., மற்றும் ஹிந்து முன்னணி இயக்கத்தினர் இணைந்து, சூலூர், கருமத்தம்பட்டி சுற்றுவட்டாரத்தில் உள்ள, 15 க்கும் மேற்பட்ட கிராமங்களில், கபசுர குடிநீர் மற்றும் ஹோமியோபதி மாத்திரைகளை வழங்கியுள்ளனர். இதன்மூலம், தினமும், 10 ஆயிரத்துக்கும் மேற்பட்ட மக்கள் பயன்பெற்றுள்ளனர். இதுகுறித்து அமைப்பின் நிர்வாகிகள் கூறுகையில், தினமும் ஒவ்வொரு கிராமமாக சென்று, வார்டு வாரியாக கபசுர குடிநீர், மாத்திரைகள் வழங்கப்படுகின்றன. மருந்து உட்கொள்ளும் முறை குறித்து விளக்கப்பட்டு, தடுப்பூசி போட்டுக்கொள்வதின் பயன் குறித்து விழிப்புணர்வு ஏற்படுத்தி வருகிறோம் என்றனர்.