அம்மனுக்கு நவராத்திரி அல்லவா! இதோ! சிவராத்திரியைக் கொண்டாடுவதன் மூலம் சிவமும் சக்தியும் ஒன்றே என்பதை நிரூபிக்கும் கவுமாரியம்மன் தேனி மாவட்டம் கம்பத்தில் அருள்புரிகிறாள். மாரியம்மனை பராசக்தியின் அம்சம் என்பர். ஆனால், சிவமும், சக்தியும் ஒன்று என்பதன் அடிப்படையில், சிவராத்திரியன்று இரவில் இந்த மாரியம்மனுக்கு, சிவனைப்போலவே அலங்காரம் செய்து பூஜிக்கின்றனர். அப்போது அம்பிகைக்கு நெற்றிக்கண் சூடி, தலையில் பிறைச்சந்திரன், கங்காதேவி, கையில் உடுக்கை, சூலம் ஆகியவற்றுடன், புலித்தோல் நிற ஆடை அணிவித்து அலங்கரிப்பர். சிவனுக்குரிய முறைப்படி நள்ளிரவில் 6 கால பூஜையும் நடக்கும். இந்த வேளையில் அம்பிகையைத் தரிசிப்பது மிகவும் விசேஷம். இங்குள்ள உற்சவ அம்பாள், நான்கு தலை நாகத்தின் கீழ் காட்சி தருகிறாள். வெள்ளிக்கிழமைகளில் இவள் பல்லக்கில் எழுந்தருளி, பிரகார உலா செல்வாள். பெண்கள் மட்டுமே இந்த பல்லக்கை தூக்கிச் செல்வர். சித்திரை மாதத்தில் இவளுக்கு 21 நாட்கள் திருவிழா விமரிசையாகக் கொண்டாடப்படுகிறது. இவ்விழாவின் போது பக்தர்கள் அக்னி சட்டி எடுத்தும், பூக்குழி இறங்கியும் வேண்டிக்கொள்வர்.