அமராவதி : ஆந்திர அரசு, புட்டபர்த்தி ஸ்ரீ சத்ய சாய் மத்திய அறக்கட்டளையின் சிறப்பான பொதுநல சேவையை பாராட்டும் வகையில், ஒய்.எஸ்.ஆர்., வாழ்நாள் சாதனையாளர் விருது வழங்கி கவுரவித்து உள்ளது.

ஆந்திராவில் முதல்வர் ஜெகன்மோகன் ரெட்டி தலைமையில் ஒய்.எஸ்.ஆர். காங்., ஆட்சி நடக்கிறது. இங்கு, ஜெகனின் தந்தையும், மறைந்த முன்னாள் முதல்வருமான ராஜசேகர ரெட்டியின் நினைவாக பல்வேறு துறைகளில் சிறப்பாக செயல்படுவோருக்கு ஒய்.எஸ்.ஆர்., வாழ்நாள் சாதனையாளர் விருதுகள் வழங்கப்படுகின்றன. இந்நிலையில் நேற்று ஆந்திரா உருவான தினத்தையொட்டி விஜயவாடாவில், ஒய்.எஸ்.ஆர்., வாழ்நாள் சாதனையாளர் விருது வழங்கும் விழா நடந்தது. இதில் ஆந்திர கவர்னர் பிஸ்வபூஷன் ஹரிசந்திரன், முதல்வர் ஜெகன்மோகன் ரெட்டி ஆகியோர் பங்கேற்று, வாழ்நாள் சாதனையாளர் விருது, சாதனையாளர் விருது ஆகியவற்றை வழங்கி சிறப்பித்தனர். இவ்விழாவில் ஸ்ரீ சத்ய சாய் மத்திய அறக்கட்டளை சார்பில், அதன் நிர்வாகி ஆர்.ஜே.ரத்னாகர் வாழ்நாள் சாதனையாளர் விருதை பெற்றுக் கொண்டார். ஸ்ரீ சித்தேந்திர யோகி கலாஷேத்ரம் உள்ளிட்ட 11 நிறுவனங்கள் மற்றும் தனி நபர்களுக்கு வாழ்நாள் சாதனையாளர் விருதுகள் வழங்கப்பட்டன. வாழ்நாள் சாதனையாளர் விருதுக்கு தேர்வான பிரபலங்களுக்கு தலா, 10 லட்சம் ரூபாய் மற்றும் நினைவுப் பரிசு வழங்கப்பட்டது. இதேபோல சமூகத்திற்கு சிறந்த வகையில் தொண்டு புரிந்த ஏழு நிறுவனங்கள் மற்றும் 25 தனி நபர்களுக்கு சாதனையாளர் விருது வழங்கப்பட்டன. இதில் தலா, 5 லட்சம் ரூபாயுடன் நினைவுப் பரிசு தரப்பட்டது.