தொண்டாமுத்தூர்: தென்னமநல்லூரில் உள்ள கரிய காளியம்மன் கோவிலில், சாமி கழுத்தில் இருந்து நகையை திருடி சென்ற மர்ம நபர்களை போலீசார் தேடி வருகின்றனர்.
தென்னமநல்லூரில், அறநிலையத்துறையின் கட்டுப்பாட்டின் கீழ் உள்ள கரிய காளியம்மன் கோவில் உள்ளது. இக்கோவிலின் பூசாரி, நேற்றுமுன்தினம் இரவு, வழக்கம்போல கோவிலை பூட்டி விட்டு சென்றுள்ளார். இந்நிலையில், நேற்று காலை, கோவிலுக்கு சென்று பார்த்தபோது, கோவிலின் கதவு திறக்கப்பட்ட நிலையில் இருந்துள்ளது. உள்ளே சென்று பார்த்தபோது, அம்மனின் கழுத்தில் இருந்த, 1 பவுன், தாலி செயின் மாயமானதைக்கண்டு அதிர்ச்சியடைந்தார். இதுகுறித்து தக்கார் (பொ) சந்திரன் தொண்டாமுத்தூர் போலீசில் புகார் அளித்தார். இதனையடுத்து, பேரூர் டி.எஸ்.பி., திருமால் சம்பவ இடத்தில், நேரில் விசாரணை செய்தனர். இதுகுறித்து, தொண்டாமுத்தூர் போலீசார் வழக்குப்பதிவு செய்து விசாரித்து வருகின்றனர். அனைத்து கோவில்களில், கதவு முறையாக பூட்டப்பட்டுள்ளதா என்பதை உறுதி செய்து கொள்ள வேண்டும். அதோடு, கோவில் வளாகத்தை சுற்றிலும், சி.சி.டி.வி., கேமரா பொருத்த வேண்டும் என, போலீசார் தெரிவித்துள்ளனர்.