மதுரை: மதுரை சித்திரை திருவிழாவின் முக்கிய நிகழ்ச்சியான மீனாட்சி அம்மன் சுந்தரேஸ்வரர் திருக்கல்யாணத்தன்று 50 ஆயிரம் பக்தர்களுக்கு இலவசமாக தண்ணீர் பாட்டில், பிஸ்கட், மாங்கல்யம் கொண்ட பையை கோயில் நிர்வாகம் வழங்குகிறது.

கொரோனா ஊரடங்கால் இரு ஆண்டுகளாக சித்திரை திருவிழா பக்தர்களின்றி நடந்தது. மீனாட்சி திருக்கல்யாணம், ஆற்றில் அழகர் இறங்குதல் நிகழ்ச்சிகள் கோயிலுக்குள் நடத்தப்பட்டன. இந்நிகழ்ச்சிகளை ஆன்லைனில் ஒளிபரப்பு செய்தாலும் நேரில் தரிசிக்கும் ஆத்மதிருப்தி பக்தர்களுக்கு ஏற்படவில்லை. இந்தாண்டு ஊரடங்கு தளர்வால் சித்திரை திருவிழா பக்தர்களுடன் கொண்டாடப்பட உள்ளது. ஏப்., 5ல் கொடியேற்றத்துடன் திருவிழா துவங்குகிறது. ஏப்.,14 தமிழ் புத்தாண்டு அன்று காலை 10:35 முதல் 10:59 மணிக்குள் மீனாட்சி சுந்தரேஸ்வரர் திருக்கல்யாணம் நடக்கிறது. ஏற்பாடுகளை கோயில் நிர்வாகம் செய்கிறது. இம்முறை 50 ஆயிரம் பக்தர்களுக்கு குறிப்பாக தெற்கு கோபுரம் வழியாக கோயிலுக்குள் வர நீண்டநேரம் காத்திருக்கும் பக்தர்களுக்கு முன்னுரிமை அளித்து நிர்வாகம் சார்பில் பை ஒன்று இலவசமாக வழங்கப்படுகிறது. ஏற்பாடுகளை தக்கார் கருமுத்து கண்ணன், இணைகமிஷனர் செல்லத்துரை செய்து வருகின்றனர்.