சென்னை : திருவல்லிக்கேணி பார்த்தசாரதி பெருமாள் கோவில், சித்திரை மாத பிரம்மோற்சவ விழாவில் நேற்று, கருடசேவை உற்சவம் நடந்தது. இதில், ஏராளமான பக்தர்கள் பங்கேற்றனர்.

சென்னை திருவல்லிக்கேணியில் உள்ள பார்த்தசாரதி பெருமாள் கோவிலில், சித்திரை மாத பிரம்மோற்சவம், 16ம் தேதி கொடியேற்றத்துடன் துவங்கியது. விழாவின் இரண்டாம் நாளான நேற்று முன்தினம் காலை, சேஷ வாகனத்தில் பெருமாள் பரமபதநாதன் திருக்கோலத்திலும், இரவு சிம்ம வாகனத்தில் மாடவீதிகளை வலம் வந்து, பக்தர்களுக்கு அருள்பாலித்தார். பிரம்மோற்சவத்தின் முக்கிய விழாக்களில் ஒன்றான கருட சேவை உற்சவம் நேற்று நடந்தது. நேற்று அதிகாலை உற்சவர் பார்த்தசாரதி பெருமாளுக்கு, சிறப்பு அபிஷேக, அலங்காரம் நடந்தது.இதையடுத்து, கருட வாகனத்தில் உற்சவர் எழுந்தருளினார். நேற்று காலை 5:00 மணிக்கு கோபுரவாசல் தரிசனம் நடந்தது. பின், மாட வீதிகளை வலம் வந்த பார்த்தசாரதி பெருமாள், பக்தர்களுக்கு அருள் பாலித்தார். அதைத் தொடர்ந்து காலை, 11:30 மணிக்கு ஏகாந்தசேவையும், இரவு ஹம்ச வாகன புறப்பாடும் நடந்தது.