மானாமதுரை: மானாமதுரை வீர அழகர் கோயில் சித்திரை திருவிழா நிறைவு விழாவில் வீர அழகர் வீதி உலா சென்று கோயிலை சென்றடைந்தார்

சிவகங்கை சமஸ்தானம் தேவஸ்தானம் நிர்வாகத்துக்குட்பட்ட மானாமதுரை வீர அழகர் கோயிலில் வருடந்தோறும் சித்திரை திருவிழா தொடர்ந்து 10 நாட்கள் நடைபெறும். விழா நாட்களின் போது தினந்தோறும் சுவாமி பல்வேறு மண்டகப்படிகளில் எழுந்தருளி வீதியுலா செல்வது வழக்கம்.இந்நிலையில் கடந்த 2 வருடங்களாக கொரோனா காரணமாக சித்திரை திருவிழா நடைபெறாத நிலையில் இந்தாண்டு சித்திரை திருவிழா கடந்த 12ம் தேதி கொடியேற்றத்துடன் துவங்கியது.விழா நாட்களின்போது தினந்தோறும் வீர அழகர் பல்வேறு மண்டகப்படிகளில் எழுந்தருளி வீதி உலா வந்தார்.விழாவின் முக்கிய நிகழ்ச்சிகளான எதிர்சேவை கடந்த 15ம் தேதியும்,ஏப்.16ம் தேதி வைகை ஆற்றில் வீர அழகர் இறங்கும் நிகழ்ச்சியும் நடைபெற்றது.இதனை தொடர்ந்து 18ந் தேதி கோர்ட்டார் மண்டகப்படியில் தசாவதார நிகழ்ச்சி நடைபெற்றது.நேற்று மேல்கரை கடைவீதி மண்டகப்படியில் வீதி உலா சென்ற வீர அழகர் அதன் பின்னர் கோயிலைச் சென்றடைந்தார்.இன்று கோயிலில் உற்சவ சாந்தியுடன் சித்திரை திருவிழா நிறைவு பெறுகிறது.