மதுராந்தகம்: மோச்சேரி திரவுபதியம்மன் கோவிலின் துரியோதனன் படுகளம் நேற்று விமரிசையாக நடந்தது. மதுராந்தகம் அடுத்த மோச்சேரியில், பிரசித்தி பெற்ற திரவுபதியம்மன் கோவில் உள்ளது. இங்கு, அக்னி வசந்த உற்சவம், இம்மாதம் 4ம் தேதி கொடியேற்றத்துடன் துவங்கியது.

விழாவையொட்டி, கடந்த 8ம் தேதி முதல் தினமும் மதியம் 2:00 மணி முதல் மாலை 6:00 மணி வரை, மகாபாரத சொற்பொழிவு நிகழ்ச்சி நடந்தது.கடந்த, 15ம் தேதி முதல் தினமும் இரவு 9:00 மணிக்கு, பாரதமாதா நாடக சபாவின் மகாபாரத தெருக்கூத்து நாடகம் நடந்தது.நேற்று காலை 10:00 மணிக்கு அரவான் களபலி, துரியோதனன் படுகளம் நிகழ்ச்சி நடந்தது. திரவுபதி அம்மனுக்கு, துரியோதனின் கூந்தல் முடித்து, பூச்சூட்டும் நிகழ்ச்சி நடந்தது. மாலை, 4:00 மணிக்கு தீ மிதி திருவிழா நடந்தது. பூங்கரகம் அலங்கரித்து கோவிலுக்கு ஊர்வலமாக வந்த பக்தர்கள், அக்னி குண்டத்தில் இறங்கி தீ மிதித்தனர்.இன்று, பட்டாபிஷேகம் நடக்கிறது. இதற்கான ஏற்பாடுகளை, கோவில்நிர்வாகிகள், கிராம மக்கள் மற்றும் உபயதாரர்கள் செய்தனர்.