சிதம்பரம்: சிதம்பரம் நடராஜர் கோவிலில் ஆனி திருமஞ்சன திருவிழா நாளை கொடியேற்றத்துடன் துவங்குகிறது.

கடலூர் மாவட்டம் சிதம்பரத்தில் உலக புகழ்பெற்ற நடராஜர் கோவில் உள்ளது. பஞ்சபூத தலங்களில் ஆகாய தலமாக விளங்கும் இக்கோவிலில் ஆண்டுதோறும் 6 மகா அபிஷேகம் நடைபெறுவது வழக்கம். இதில் சிறப்பு வாய்ந்த மார்கழி மாதத்தில் வரும் ஆருத்ரா தரிசன விழா ஆனி மாதத்தில் வரும் ஆனித் திருமஞ்சன திருவிழா வெகு விமரிசையாக நடைபெறுவது வழக்கம் இந்த 2 திருவிழாக்களையும் காண தமிழகம் மட்டுமன்றி வெளி மாநிலங்களில் இருந்தும் ஆயிரக்கணக்கான பக்தர்கள் சிதம்பரத்தில் ஒன்று திரண்டு நடராஜரை தரிசனம் செய்வார்கள் அதன்படி இந்த ஆண்டுக்கான ஆனி திருமஞ்சன விழா நாளை (27-ந் தேதி) காலை 6 மணி முதல் 7மணிக்குள் மிதுன லக்னத்தில் கொடியேற்றத்துடன் தொடங்குகிறது. இதைத் தொடர்ந்து தினமும் காலை மாலை பஞ்சமூர்த்திகள் வீதி உலா நடைபெறுகிறது அடுத்த மாதம் (ஜூலை) 1-ந்தேதி தெருவடைச்சான் உற்சவமும், விழாவின் சிறப்பு நிகழ்வான தேரோட்டம் , 5ம் தேதியும், ஆனித்திருமஞ்சன தரிசனம் 6-ந்தேதியும் நடைபெறுகிறது. விழா ஏற்பாடுகளை நடராஜர் கோயில் பொது தீட்சிதர்கள் செய்து வருகின்றனர்.