போடி: போடி அருகே தீர்த்த தொட்டி ஆறுமுக நாயனார் கோயில் வளாகப் பகுதியில் பயன்பாடற்ற சுகாதார வளாகம், மாசடைந்த தீர்த்த தொட்டி சுனை நீரால் பக்தர்கள் பல்வேறு வகையில் சிரமம் அடைந்து வருகின்றனர்.

போடி ஊராட்சி ஒன்றியம், கோடங்கிபட்டி ஊராட்சி ஒன்றியத்துக்கு உட்பட்ட போடி - தேனி மெயின் ரோட்டில் அமைந்துள்ளது தீர்த்த தொட்டி ஆறுமுக நாயனார் கோயில்:ஆண்டுதோறும் சித்திரை முதல் தேதியில் திருவிழா நடக்கும். எப்போதும் வற்றாத நிலையில் மூலிகை கலந்த சுனை நீர் வரும் வகையில் தொட்டி இங்கு அமைந்துள்ளது. இக்கோவிலுக்கு வரும் பக்தர்கள் சுனை நீரில் நீராடுவர். முருகன், ஐயப்பன் கோயிலுக்கு செல்லும் பக்தர்கள் மாலை அணிந்து நீராடி செல்வதற்கு புனித இடமாக உள்ளது. சுனை நீர் தொட்டி அமைந்துள்ள பகுதியில் மண் தூசுகள், குப்பை கழிவுகள் மாசடைந்து கழிவுநீர் வெளியே செல்ல முடியாமல் தேங்கி கிடக்கிறது. இதனால் பக்தர்கள் நீராட முடியாமல் பல்வேறு வகையில் சிரமம் அடைந்து வருவதோடு, சுகாதாரகேடும் ஏற்பட்டுள்ளது.

ஆண்,பெண் இருபாலருக்கும் தனித்தனியே சுகாதார வளாகம், உடை மாற்றும் அறைக்கான கட்டடம் கட்டப்பட்டும் உரிய பராமரிப்பு, தண்ணீர் வசதி இல்லாமல் பயன்பாடின்றி காட்சி பொருளாக உள்ளது. இதோடு சுனை நீரில் நீராடி வரும் பெண் பக்தர்கள் உடை மாற்ற முடியாமல் பல்வேறு வகையில் சிரமம் அடைந்து வருகின்றனர். பக்தர்கள் பயன் பெறும் வகையில் சுனைநீர் தொட்டியை சுத்தப்படுத்தி, சுகாதார வளாகத்தை பயன்பாட்டிற்கு கொண்டு வருவது உள்ளிட்ட அடிப்படை வசதிகள் செய்து தர அறநிலையத்துறை நிர்வாகம் நடவடிக்கை எடுக்க வேண்டும்.