மேட்டுப்பாளையம்: மேட்டுப்பாளையத்தில் அற்புத கெபி ஆரோக்கிய அன்னை தேர்த்திருவிழா நடைபெற்றது.

மேட்டுப்பாளையம் - காரமடை ரோட்டில் சிவன்புரத்தில் அற்புத கெபி ஆரோக்கிய அன்னை ஆலயம் உள்ளது. இதன் தேர் திருவிழா கொடி ஏற்றம், கடந்த ஒன்பதாம் தேதி மேட்டுப்பாளையம் வட்டார  முதன்மை குரு ஜோசப் டேவிட் திருப்பலியை நிறைவேற்றி கொடியேற்றி வைத்தார். விழாவில், 17ம் தேதி வரை ஒவ்வொரு நாளும் ஒவ்வொரு பாதிரியார் திருப்பலி, மறையுரை, நவநாள் ஆகியவற்றை  நிறைவேற்றினர். நேற்று காலை நல்லாயன் குருத்துவக் கல்லூரி பேராசிரியர் பாதிரியார் பெனெட்டிக் பிரபாகரன் திருப்பலியை நிறைவேற்றி, குழந்தைகளுக்கு முதல் நற்கருணை திருவருட்சாதன  வழங்கினார். மாலையில் கோவை மறைமாவட்ட முதன்மை குரு ஜான் ஜோசப் ஸ்தனிஸ், கூட்டு பாடல் பலியை நிறைவேற்றி, ஆரோக்கிய மாதாவின் ஆடம்பர தேர் பவனியை துவக்கி வைத்தார்.  இவ்விழாவில் மேட்டுப்பாளையம் பங்கு பாதிரியார் ஹென்றி லாரன்ஸ் உள்பட பல்வேறு பாதிரியார்கள் பங்கேற்றனர். மாதாவின் தேர்பவனி காரமடை - மேட்டுப்பாளையம் ரோட்டில் மீனாட்சி பஸ் ஸ்டாப்  வரை சென்று, மீண்டும் ஆலயத்தை அடைந்தது. அதன் பின்பு நற்கருணை ஆசீர் வழங்கப்பட்டது. விழா ஏற்பாடுகளை பங்கு பாதிரியார் பிரான்சிஸ் ரொசாரியோ மற்றும் பங்கு மக்கள் செய்திருந்தனர்.