ராமேஸ்வரம்: ராமேஸ்வரம் கோயிலில் பல லட்சம் ரூபாய் மதிப்புள்ள மரக்கட்டில்கள் பயன்படுத்தாமல் குவித்துள்ளதால், வீணாகும் அவலம் உள்ளது.

ராமேஸ்வரம் ராமநாதசுவாமி கோயில் சொந்தமான விவேகானந்தர் மற்றும் சேது தங்கும் விடுதியில் 50 அறைகள் உள்ளது. இந்த விடுதிகள் கோயில் கிழக்கு ரதவீதியில் இருந்ததால், கோயிலுக்கு வரும் பக்தர்கள் இங்கு தங்கி புனித நீராடி, சுவாமி தரிசனம் செய்தனர். இதில் விவேகானந்தர் இல்லம் பலவீனமாகியதால், கோயில் நிர்வாகம் இடிக்க முடிவு செய்து அங்கிருந்த மரக்கட்டில்களை அகற்றி, கோயிலுக்கு சொந்தமான குழுமணி எனும் இல்லத்தில் குவித்து வைத்தனர். மேலும் பல கட்டில்கள் வெளியிலும் போட்டுள்ளனர். இதனால் மழை, வெயில் பல லட்சம் ரூபாய் மதிப்புள்ள மரக்கட்டில்கள் பலவீனமாகி வருவதால், கோயில் நிதி அதாவது பக்தர்கள் செலுத்திய காணிக்கை வீணாகி போகும் அவலம் உள்ளது. எனவே கோயில் கிழக்கு ரதவீதியில் பக்தர்களுக்கு இலவச ஓய்வறை அமைத்து முடங்கி கிடக்கும் மரக்கட்டில்களை பயன்படுத்திட ஹிந்து அறநிலையத்துறை நடவடிக்கை எடுக்க வேண்டும்.