பரமக்குடி: பரமக்குடி சிவன் கோயில்களில் சனி வார பிரதோஷ விழா நடந்தது.

பரமக்குடி ஈஸ்வரன் கோயிலில் சந்திரசேகர சுவாமி சன்னதியில் பிரதோஷ நந்தி அருள்பாலிக்கிறார். இங்கு மாலை 4:15 மணி முதல் சனி வார பிரதோஷத்தை முன்னிட்டு, சிறப்பு அபிஷேக, ஆராதனைகள் நடந்தன. தொடர்ந்து நந்தி வெள்ளி கவசத்தில் அலங்கரிக்கப்பட்டு, வில்வ இலைகளால் அர்ச்சனை செய்யப்பட்டது. பின்னர் நந்தி வாகனத்தில் விசாலாட்சி அம்பிகா சமேத சந்திர சேகர சுவாமி கோயில் உள் பிரகாரத்தில் சிவ மந்திரங்கள் முழங்க வலம் வந்தார். ஏராளமான பக்தர்கள் ஹர ஹர, சிவசிவ கோசத்துடன் சுவாமி தரிசனம் செய்தனர். இதே போல் மீனாட்சி சுந்தரேஸ்வரர் கோயிலில் நந்தி பகவானுக்கு சிறப்பு அபிஷேகம் நடந்தது. மேலும் நயினார்கோவில் நாகநாத சுவாமி கோயிலில், நந்திக்கு சிறப்பு அபிஷேகம் செய்யப்பட்டு, தீபாராதனைகள் காண்பிக்கப்பட்டன. ஏராளமான பக்தர்கள் சுவாமி தரிசனம் செய்தனர்.