அச்சிறுபாக்கம் : அச்சிறுபாக்கம் அருகே, கரசங்கால் கிராமத்தில், தான்தோன்றி அம்மன், எட்டியம்மன், விநாயகர் கோவில் மற்றும் புதிதாக நிர்மாணம் செய்யப்பட்ட ஆஞ்சநேயர் சுவாமி, வீரபத்திர சுவாமி உள்ளிட்ட ஐந்து ஆலயங்களுக்கு, மஹா கும்பாபிஷேக விழா, நேற்று நடந்தது. விழாவையொட்டி, கடந்த 2 நாளைக்கு முன், கோவில் வளாகத்தில் யாக குண்டங்கள் அமைக்கப்பட்டு, விநாயகர் பூஜையுடன் யாக சாலை பூஜைகள் துவங்கின. தொடர்ந்து, நான்கு கால யாக சாலை பூஜைகளும் நடந்தன. நேற்று, யாக குண்டத்திலிருந்து கலசங்கள் புறப்பட்டு, கோவில் கோபுர கலசங்களுக்கு புனித நீர் ஊற்றி, கும்பாபிஷேகம் நடத்தப்பட்டது. இதில், நெடுங்கல், அல்லுார், வெளியம்பாக்கம் சுற்றுப்புற கிராமத்திலிருந்து, 3 ஆயிரத்திற்கும் மேற்பட்ட பக்தர்கள், மற்றும் பகுதி மக்கள் பங்கேற்று, சுவாமி தரிசனம் செய்தனர். தொடர்ந்து, பக்தர்களுக்கு பிரசாதம், அன்னதானம் வழங்கப்பட்டது. இரவு, வாண வேடிக்கையுடன், சுவாமி வீதி உலா வந்தது.