ஸ்ரீவில்லிபுத்தூர்: சதுரகிரி சுந்தர மகாலிங்கம் கோயிலில் கார்த்திகை மாத பிரதோஷ வழிபாடு பக்தர்களின்றி நடந்தது. சுவாமி தரிசனம் செய்ய முடியாமல் பக்தர்கள் ஏமாற்றத்துடன் திரும்பினர்.

கனமழை எச்சரிக்கை காரணமாக பக்தர்களுக்கு அனுமதி இல்லை என வனத்துறை அறிவித்திருந்த நிலையில், நேற்று காலை கார்த்திகை மாத பிரதோஷ வழிபாட்டிற்காக நூற்றுக்கும் மேற்பட்ட பக்தர்கள் தாணிப்பாறை மலை அடிவாரத்தில் குவிந்திருந்தனர். ஆனால், அவர்களை வனத்துறை அனுமதிக்கவில்லை. இதனால் சிறிது நேரம் நின்ற பக்தர்கள், பின்பு வனத்துறை கேட் வாசலில் சூடம் ஏற்றி, கோயிலை நோக்கி வணங்கி ஏமாற்றத்துடன் திரும்பிச் சென்றனர். கோயிலில் மாலை 4:30 மணிக்கு மேல் சுந்தர மகாலிங்கம், சந்தன மகாலிங்கம், சுந்தரமூர்த்தி சுவாமிகளுக்கு பிரதோஷ வழிபாடு பூஜைகளை கோயில் பூசாரிகள் செய்தனர். ஏற்பாடுகளை அறங்காவலர் ராஜா பெரியசாமி, செயல் அலுவலர் நாகராஜ், அலுவலர்கள் செய்திருந்தனர். தற்போது மழை பெய்யவில்லை என்பதால் நாளை அமாவாசை வழிபாட்டிற்கு அனுமதிக்க வேண்டுமென சதுரகிரி பக்தர்கள் எதிர்பார்க்கின்றனர்.