பரமக்குடி: பரமக்குடி, எமனேஸ்வரம், நயினார் கோவில் உள்ளிட்ட பகுதிகளில் உள்ள சிவன் கோயில்களில் கார்த்திகை சோமவார பிரதோஷ விழா நடந்தது.

எமனேஸ்வரத்தில் அருள் பாலிக்கும் எமன் ஈஸ்வரனுக்கு சாப விமோசனம் அளித்த எமனேஸ்வரமுடையவர் கோயிலில் பிரதோஷ விழா நடந்தது. நேற்று மாலை 5:00 மணிக்கு பிரதோஷ நந்திக்கு சிறப்பு அபிஷேக, அலங்காரம் நடந்தது. தொடர்ந்து சுவாமி, அம்பாள் ரிஷப வாகனத்தில் எழுந்தருளி கோயில் பிரகாரத்தில் வலம் வந்தனர். ஏராளமான பக்தர்கள் சுவாமி தரிசனம் செய்தனர். நயினார் கோவில் நாகநாத சுவாமி கோயிலில் கொடிமரம் முன்புள்ள பிரதோஷ நந்திக்கு சிறப்பு அபிஷேகம் நடந்தது. பின்னர் தீபாராதனைக்கு பின் பக்தர்களுக்கு பிரசாதங்கள் வழங்கப்பட்டன. பரமக்குடி ஈஸ்வரன் கோயில், மீனாட்சி அம்மன் கோயில்களில் உள்ள பிரதோஷ நந்திக்கு சிறப்பு அபிஷேகங்கள் நடந்து வெள்ளி கவசம் சாற்றப்பட்டது. பின்னர் ரிஷப வாகனத்தில் சுவாமி வலம் வந்து தீபாராதனைகள் நடந்தன. கீழப்பெருங்கரையில் அருள் பாலிக்கும் அட்டாளசொக்கநாதர் கோயிலில் பிரதோஷ நந்திக்கு அபிஷேகங்கள் நடந்து, ஏராளமான பக்தர்கள் சுவாமி தரிசனம் செய்தனர்.