மதுரை: மேலூர் வட்டம், தும்பைப்பட்டி  சிவாலயபுரத்தில் எழுந்தருளி அருள்பாலித்து வரும் அருள்மிகு கோமதி அம்பிகை சமேத, சங்கர லிங்கம் சுவாமி, சங்கர நாராயணர் சுவாமி திருக்கோயிலில் கார்த்திகை மாத,  வளர்பிறை மூன்றாவது  சோமவார சங்காபிஷேகம், வளர்பிறை பிரதோஷ சிறப்பு பூஜை வழிபாடு நடைபெற்றது.

நாட்டில் மக்கள் நோயற்ற வாழ்விற்கும், அமைதி தழைத்தோங்கவும்,  விவசாயம் செழித்தோங்கவும், மழை பெய்ய வேண்டியும், கொரோனா தொற்று நோயிலிருந்து மக்கள் விடுபடவும், சிறப்புப் பிரார்த்தனை நடைபெற்றது. மாலை 4.30 மணிக்கு, 108 வெண் சங்குகளில் ரதிருச்சி காவிரியில்  இருந்து எடுத்து வரப்பெற்ற புனித தீர்த்தம் நிரப்பப்பெற்று, கும்பம் வைத்து யாகசாலை அக்னி மகா ஹோமம் நடைபெற்றது. அதனை தொடர்ந்து நந்தி எம்பெருமானுக்கும், அருள்மிகு சங்கரலிங்கம் சுவாமிக்கும், எண்ணெய் காப்பு சாற்றி, திரவியம்,  மஞ்சள்,  பஞ்சகவ்யம், பச்சரிசி மாவு, திருமஞ்சனம்,   பால்,  தயிர், இளநீர், கரும்பு சாறு, பழச்சாரு, பஞ்சாமிர்தம், தேன், ஸ்வர்ணம்,  சந்தனம், பன்னீர், திருநீர் போன்ற பதினாறு வகையான அபிக்ஷேகங்களும், காவிரி தீர்த்தம் நிரப்பி,  பூஜை செய்த 108 சங்காபிஷேகமும், கும்பம் புனித நீராலும் அபிஷேகம் நடைபெற்றது. பிரதோஷ மூர்த்திகள் சிறப்பு அலங்காரத்தில் ரிஷப வாகனத்தில், சங்கு நாதம் முழங்க, கோயிலை மூன்று முறை வலம் வந்து பக்தர்களுக்கு அருளாசி வழங்கினார்கள். இன்றைய இறைப் பணியில் கட்சிராயன்பட்டியை, கட்சிராயன்பட்டி, சேர்ந்த சிவ.ராசு - சிவ. பழனியம்மாள், சிவ. சங்கர் - சிவ.மங்கயர்கரசி, சிவ. முத்துக்குமார் - சிவ. மீனாட்சி, சிவ.மதிவாணன் - சிவ. திலகா குடும்பத்தினர் செய்திருந்தனர். பக்தர்கள் கோளாறு பதிகம், நந்தியம் பதிகம் சிவபுராணம், தேவாரம், திருவாசகம் பாராயணம் செய்தனர்.