விழுப்புரம்: விழுப்புரம் மாவட்ட தமிழ்நாடு இந்து திருக்கோயில் கூட்டமைப்பு சார்பில் உலக அமைதியும், இயற்கை சீற்றங்களின்றி, பருவத்தில் மழை பெய்ய வேண்டியும் திருவிளக்கு பூஜை நடந்தது. விழுப்புரம் அருகே வீடூர் பிரகன்நாயகி சமேத பிரகதீஸ்வரர் ஆலயத்தில் நடந்த சிறப்பு பூஜைக்கு, அமைப்பின் மாவட்ட தலைவர் பாபு தலைமை வகித்தார். துணைத் தலை வர்கள் அம்மன் கருணாநிதி, சுபா ஆகியோர் முன்னிலை வகித்து, 108 திருவிளக்கு பூஜையை குத்து விளக்கு ஏற்றி துவக்கி வைத்தனர். திருவிளக்கு பூஜை மாலை 5:30 தொடங்கி இரவு 8:30 மணி வரை நடைபெற்றது. தொடர்ந்து பிரகதீஸ்வரர் உற்சவ மூர்த்திக்கு சிறப்பு அபிஷேக, ஆராதனைகள் நடை பெற்றது. சந்தன காப்பு அலங்காரத்தில், பிரகன்நாயகி சமேத பிரகதீஸ்வரர் பக்தர்களுக்கு அருள்பாலித்தார். இந்து திருக்கோயில் கூட்டமைப்பு மாவட்ட நிர்வாகிகள் பழனிவேல், திரிபுரசுந்தரி, முகிலன், சௌந்தர்யா, முகிலரசன், ரவீனா, கலையரசி மற்றும் பொது மக்கள் பலர் கலந்து கொண்டு, குத்துவிளக்கேற்றி உலகநன்மை , அமைதி வேண்டி வழிபட்டனர்.