மணவாளக்குறிச்சி: மண்டைக்காடு பகவதிஅம்மன் கோவில் மாசிக்கொடை விழாவில் இன்று நள்ளிரவு வலிய படுக்கை பூஜை நடக்கிறது. குமரி மாவட்டத்தில் பிரசித்தி பெற்ற
கோவில்களில் மண்டைக்காடு பகவதி அம்மன் கோவிலும் ஒன்று. கேரள பெண் பக்தர்கள் இருமுடி கட்டி இங்கு வந்து அம்மனை வழிபடுவதால் இக்கோவில் பெண்களின் சபரிமலை என்று அழைக்கப்படுகிறது.

வலியபடுக்கை என்னும் மஹா பூஜை நடக்கிறது. வலியபடுக்கை பூஜை என்பது நள்ளிரவு வேளை அம்மனுக்கு மிகவும் பிடித்த உணவு, கனி வகைகள், இனிப்பு போன்ற பதார்த்தங்களை அம்மன் முன் பெரும் படையலாக படைத்து நடக்கும் சிறப்பு பூஜையாகும். இந்த வழிபாடு மாசிக்கொடையின் 6ம் நாளன்றும், மீன பரணிக்கொடை விழா அன்றும், கார்த்திகை மாதத்தின் கடைசி வெள்ளிக்கிழமை என வருடத்திற்கு 3 முறை மட்டும் நடக்கும் என்பது குறிப்பிடத்தக்கது. இதனால் இது முக்கிய வழிபாடாக கருதப்படுகிறது. பக்தர்கள் நள்ளிரவு வரை காத்திருந்து இந்த வலியபடுக்கை பூஜையில் கலந்து கொள்வர். இப்பூஜையில், படைக்கப்படும் பதார்த்தங்கள், கனிகள் நாளை காலை பக்தர்களுக்கு பிரசாதமாக வழங்கப்படும்.