திருப்புவனம்: தென்மாவட்டங்களில் மாரியம்மன் கோயில்களில் திருவிழாக்கள் தொடங்கியதை அடுத்து திருப்புவனத்தில் அக்னிசட்டிகள் தயாரிப்பு பணிகள் தொடங்கியுள்ளன. மாசி,பங்குனி மாதங்களில் தென்மாவட்டங்களில் திருவிழாக்கள் வெகு விமரிசையாக நடைபெறும், திருப்புவனம், தாயமங்கலம், இருக்கன்குடி உள்ளிட்ட ஊர்களில் நடைபெறும் திருவிழாக்களுக்கு பக்தர்கள் நேர்த்தி கடன் விரதமிருந்து அக்னிசட்டி, ஆயிரம் கண்பானை, பொம்மை, பாதம், நாகம் உள்ளிட்டவைகளை சுமந்து வந்து செலுத்துவது வழக்கம். இதற்காக திருப்புவனம் புதூர் வேளார் தெருவில் 10க்கும் மேற்பட்ட தொழிலாளர்கள் அக்னிசட்டி தயாரிப்பில் ஈடுபட்டு வருகின்றனர். தொழிலாளர் ராஜாங்கம் கூறுகையில் :

சுற்றுப்புற சூழலை பாதிக்காத பச்சை மண் சட்டிகள் இவைகள், தண்ணீரில் போட்டாலும் கரைந்து விடும், மண்ணை எந்த விதத்திலும் பாதிக்காது நாள் ஒன்றுக்கு 20 முதல் 25 சட்டிகள் வரை தயாரிக்கிறோம், பின் அதற்கு வர்ணம் பூசி அம்மன் படங்களை வரைந்து வெயிலில் காயவைத்து விற்பனை செய்கிறோம், அக்னி சட்டிகள் 600 ரூபாயில் இருந்து 700 ரூபாய் வரை விற்பனை செய்யப்படுகிறது. ஆயிரம் கண்பானை, பொம்மை உள்ளிட்டவைகளும் 400 ரூபாயிலிருந்து 500 ரூபாய் வரை விற்பனை செய்யப்படுகிறது. சவடு மணலுக்கு தட்டுப்பாடு இருப்பதால் தயாரிப்பு பணி சற்று தொய்வடைந்துள்ளது. கொரானோ பரவலால் கடந்த சில ஆண்டுகளாக திருவிழாக்கள் களை இழந்த நிலையில் இந்தாண்டு அனைத்து பகுதிகளிலும் திருவிழாக்கள் நடப்பதால் கூடுதலாக சட்டி தயாரித்து வருகிறோம்,என்றார்.