காரைக்குடி: காரைக்குடி மீனாட்சிபுரம் முத்துமாரியம்மன் கோயில் மாசி பங்குனி திருவிழா கொடியேற்றத்துடன் இன்று தொடங்கியது. பல்லாயிரக்கணக்கான பக்தர்கள் காப்பு கட்டினர்.

காரைக்குடி மீனாட்சிபுரம் முத்துமாரியம்மன் கோயில் மாசி- பங்குனி திருவிழா ஆண்டு தோறும் சிறப்பாக நடைபெறும். முத்துமாரியம்மன் கோயில் பால்குட திருவிழா மிகவும் பிரசித்தி பெற்ற விழாவாகும். ஒரே நாளில் லட்சக்கணக்கான பக்தர்கள் பால்குடம், தீச்சட்டி எடுத்தும் அலகு குத்தியும் நேர்த்திகடன் செலுத்துவர். முத்துமாரியம்மன் கோயில், 67 வது மாசி பங்குனி திருவிழா இன்று காலை கொடியேற்றத்துடன் தொடங்கியது. கொடியேற்றும் நிகழ்ச்சியை தொடர்ந்து காப்பு கட்டும் நிகழ்ச்சி நடந்தது. ஒரே நாளில் பல்லாயிரக்கணக்கான பக்தர்கள் காப்புக் கட்டிக் கொண்டனர். முதல் நாளான இன்று ஏராளமான பக்தர்கள் பால்குடம் தீச்சட்டி எடுத்து நேர்த்திக்கடன் செலுத்தினர். மார்ச் 21 ஆம் தேதி கோயில் கரகம், மது, முளைப்பாரி எடுக்கும் நிகழ்ச்சியும், மார்ச் 22 ஆம் தேதி காலை முக்கிய திருவிழாவான காவடி, பால்குடம் எடுக்கும் நிகழ்ச்சியும் பூக்குழி இறங்கும் நிகழ்ச்சியும் நடைபெறுகிறது. மாலையில் பருப்பூரணியில் கரகம் சேர்க்கும் நிகழ்ச்சியும், இரவு காப்பு பெருக்குதல் நிகழ்ச்சியும் நடைபெறுகிறது. மார்ச் 23, இரவு அம்மன் திருவீதி உலாவும் 24 ஆம் தேதி சந்தன காப்பு அலங்காரமும் நடைபெறுகிறது.