கோவை: கோயமுத்தூர் ஹிலால் கமிட்டி சார்பில், நேற்று மாலை நடந்த பிறை பார்க்கும் கூட்டத்தில் ரமலான் பிறை தெரியாததால், நாளை (வெள்ளிக்கிழமை) முதல் ரமலான் நோன்பு தொடர முடிவு செய்யப்பட்டது. கோயமுத்தூர் ஹிலால் கமிட்டி சார்பில், ரமலான் நோன்பு துவங்கும் நாள் குறித்து, பிறை பார்த்து முடிவு செய்வதற்கான கூட்டம், உப்பிலிபாளையம் அஹலே சுன்னத் ஜமாத் பள்ளிவாசலில் நேற்று மாலை நடந்தது. அப்துல் ரஹீம் இம்தாதி தலைமையில் கூட்டம் நடந்தது. இதில், கோயமுத்தூர் ஹிலால் கமிட்டி செயலாளர் நசார்தீன், பிறை தென்படுவது குறித்து விளக்கி கூறினார். நேற்று பிறை தென்படாததால், நாளை (வெள்ளிக்கிழமை) முதல் ரமலான் நோன்பு வைப்பது என முடிவெடுக்கப்பட்டது. இதனையொட்டி இன்று இரவு, சகர் செய்து, நாளை முதல் நோன்பு வைப்பது எனவும் முடிவு எடுக்கப்பட்டது. இதில், ஜமாத்தினர் பலர் கலந்து கொண்டனர்.