அவிநாசி: அவிநாசி அடுத்த வேலாயுதம்பாளையத்தில் எழுந்தருளியுள்ள ஸ்ரீ மஹா மாரியம்மன் பொங்கல் பூச்சாட்டு விழாவில் நூற்றுக்கும் மேற்பட்ட குழந்தைகள், பெண்கள் உள்ளிட்டோர் மாவிளக்கு எடுத்த ஊர்வலம் வெகு விமர்சையாக நடைபெற்றது.

அவிநாசி, வேலாயுதம்பாளையத்தில் எழுந்தருளியுள்ள ஸ்ரீ மஹா மாரியம்மன் கோவில் பூச்சாட்டு விழாவில் நூற்றுக்கும் மேற்பட்ட குழந்தைகள்,பெண்கள் மாவிளக்கு எடுத்து ஊர்வலமாக கோவிலுக்கு சென்றனர் .அதனைத் தொடர்ந்து, மஹா மாரியம்மனுக்கு சிறப்பு பூஜை, பொங்கல் வைத்தல், மெரமனை எடுத்தல், சேற்று வேஷம் நடனம்,கம்பம் பிடுங்குதல் உள்ளிட்ட நிகழ்ச்சிகள் நடைபெற்றது. முன்னதாக, கடந்த மாதம் 29ம் தேதி கணபதி ஹோமத்துடன் காப்பு கட்டுதல், கம்பம் நடுதலுடன் பூச்சாட்டு விழா துவங்கியது. அதன் பின்னர் 30ம் தேதி முதல் நேற்று முன்தினம் வரை பக்தர்கள் பூச்சட்டி எடுத்து ஆடுதல், படைக்கலம் எடுத்தல், அம்மை அழைத்தல்,கரகம் எடுத்தல் நடைபெற்றது. பூச்சாட்டு விழாவில் நாளை அவிநாசி ஸ்ரீ கருணாம்பிகை உடனமர் அவிநாசி லிங்கேஸ்வரர் கோவிலில் இருந்து மஹா மாரியம்மன் கோவிலுக்கு எடுத்து வருதல், பம்பை உடுக்கையுடன் பெண்கள் மஞ்சள் நீர் தீர்த்த குடம் எடுத்து ஊர்வலமாக கோவிலுக்கு செல்லும் நிகழ்ச்சி உள்ளது.மாலையில் மஞ்சள் நீராட்டுடன் பொங்கல் பூச்சாட்டு விழா நிறைவு பெறுகின்றது. பொங்கல் பூச்சாட்டு விழாவையொட்டி, விழா கமிட்டியினர் மற்றும் ஊர் பொதுமக்கள் சார்பில் பக்தர்களுக்கு அன்னதானம் வழங்கப்படுகிறது.