கரூர்: தாந்தோணி கல்யாண வெங்கடரமண ஸ்வாமி கோவிலில், நேற்று காலை தேர்த்திருவிழா நடந்தது. இதில், ஏராளமான பக்தர்கள் பங்கேற்று ஸ்வாமியை வழிபட்டனர். கரூர் அருகே உள்ள பிரசித்தி பெற்ற தாந்தோணி வெங்கடரமண ஸ்வாமி கோவிலில், ஆண்டுதோறும் புரட்டாசி மாதம் "பிரம்மோற்சவ விழா நடந்து வருகிறது. கடந்த, 15ம் தேதி கருட வாகனத்துடன் விழா துவங்கியது. தொடர்ந்து, 18ம் தேதி துவஜாரோஹணம், 21ம் தேதி வெள்ளி கருட சேவை, 24ம் தேதி திருக்கல்யாண உற்சவம் நடந்தது.நேற்று காலை, 9 மணிக்கு திருத்தேர் ஊர்வலம் நடந்தது. நூற்றுக்கணக்கான பக்தர்கள் பங்கேற்று, வடம் பிடித்து தேரை இழுத்தனர். அப்போது கூடியிருந்த பக்தர்கள் கோவிந்தா, கோவிந்தா என கோஷம் எழுப்பினர்.வரும், 4ம் தேதி ஹனுமந்த வாகனம், 7ம் தேதி முத்து பல்லக்கு, 8ம் தேதி ஆளும் பல்லக்கு, 9ம் தேதி புஷ்ப பல்லக்கு ஆகிய நிகழ்ச்சிகளும் நடக்கிறது. புரட்டாசி சனிக்கிழமைகளான வரும், 29ம் தேதி, அக்டோபர் மாதம், 6ம் தேதி மற்றும், 13ம் தேதிகளில், கோவிலில் வெங்கடரமண ஸ்வாமிக்கு சிறப்பு அபிஷேகம் மற்றும் மஹா தீபாராதனை நடக்கிறது.