காரைக்கால் : காரைக்கால் திருநள்ளாறு தர்பாரண்யேஸ்வர் கோவிலில் பிரமோற்சவ விழாவை முன்னிட்டு தங்க காக வாகனத்தில் சனீஸ்வர பகவான் வீதியுலா வந்து அருள்பாலித்தார்.

காரைக்கால் திருநள்ளார் உலக பிரசித்தி பெற்ற தர்பாரண்யேஸ்வர் கோவிலில் சனீஸ்வரபகவான் தனி சன்னதியில்  அருள்பாலித்து வருகிறார். இக்கோயிலில் பிரமோற்சவ விழா கடந்த மாதம் 16ம்தேதி கொடியேற்றத்துடன் தொடங்கியது.தினம் விநாயகர், சுப்பிரமணியர் மற்றும் சுவாமி அம்பாள்,பஞ்சமூர்த்திகள் வீதியுலா, தங்க ரிஷப வாகனத்தில் பிரணாம்பிகை தர்பாரண்யேஸ்வரர் சுவாமி வீதியுலா உள்ளிட்ட பல்வேறு நிகழ்ச்சிகள் நடைபெற்றது. விழாவின் முக்கிய நிகழ்ச்சியான திருத்தேரோட்டம் நேற்று முன்தினம்கோலாகலமாக நடைபெற்றது. நிகழ்ச்சியில் ஆயிரக்கணக்கான பக்தர்கள் கலந்து கொண்டு தேரை வடம் பிடித்து நள்ளாற தியாகேசா தியாகேசா என்று முழக்கமிட்டு இழுத்து சென்றனர். நேற்று 31ம் தேதி இரவு செண்பக தியாகராஜ சுவாமி எண்ணைய்க்கால் மண்டபத்திலிருந்து யதாஸ்தானத்திற்கு எழுந்தருளும் நிகழ்ச்சியும், தொடர்ந்து நள்ளிரவு சனீஸ்வர பகவான் தங்ககாக வாகனத்தில் சகோபுர வீதியுலா நிகழ்ச்சியும் நடைபெற்றது. இன்று 1ம் தேதி இரவு தெப்போற்சவம் நடைபெற உள்ளது.தேர்திருவிழாவில் உள்ளூர் மக்கள் மட்டுமின்றி தமிழகத்திலிருந்து பல்வேறு பகுதிமக்கள் பலர் கலந்துகொண்டனர்.பக்தர்கள் பாதுகாப்பு குறித்து எஸ்.பி.,சுப்ரணியன் தலைமையில் பல்வேறு இடங்களில் போலீசார் பாதுகாப்புபணியில் ஈடுப்பட்டனர்.