பழநி: பழநி பெரியநாயகியம்மன் கோயிலில் வைகாசி விசாக வசந்த விழாவில் திருக்கல்யாணம் நடைபெற்றது. ஏராளமான பக்தர்கள் தரிசனம் செய்தனர்.

பழநி முருகன் கோயில் நிர்வாகத்திற்கு உட்பட்ட பெரியநாயகியம்மன் கோயிலில் வசந்த விழாவான வைகாசி விசாக திருவிழா மே 27ல் கொடியேற்றத்துடன் துவங்கியது.வைகாசி விசாக திருவிழாவில் (ஜூன் 1ல்) நேற்று காலையில் தங்க பல்லாக்கு புறப்பாடு, மாலையில் வெள்ளி மயில் வாகன புறப்பாடு நடைபெற்றது. வள்ளி, தெய்வானை, முத்துக்குமாரசுவாமி திருக்கல்யாணம், இரவு 8:12 மணிக்கு நடைபெற்றது. பக்தர்கள் அரோகரா கோஷமிட்டனர். கோயில் இணை ஆணையர் பிரகாஷ், கண்காணிப்பாளர் அழகர்சாமி உள்ளிட்ட பலர் கலந்து கொண்டனர். திருவிழாவின் ஏழாம் நாளான இன்று (ஜூன் 2) காலையில் தோளுக்கினியான், திருதேரேற்றம் நடைபெறும். மாலை 4:30 மணிக்குமேல் திருத்தேரோட்டம் நடைபெறும். திருவிழாவில் தங்கமயில், காமதேனு ஆட்டுக்கடா, வெள்ளி யானை, வெள்ளி மயில், தங்கக்குதிரை வாகனங்களில் விழா நாட்களில் சுவாமி புறப்பாடு நடைபெற்றது. பத்தாம் நாள், ஜூன். 5 அன்று, இரவு கொடி இறக்குதல் நடைபெற்று வைகாசி விசாக வசந்த உற்சவம் நிறைவு பெற உள்ளது.