காரமடை : காரமடை அரங்கநாதர் சுவாமி கோவிலில் ஆடி மாத ஒன்றாம் தேதி தட்சிணாயன புண்ணிய கால தொடக்கத்தை முன்னிட்டு சிறப்பு பூஜை நடந்தது. விழாவில் சிறப்பு அலங்காரத்தில் ஸ்ரீதேவி பூதேவி சமேத ரங்கநாதர் பக்தர்களுக்கு அருள்பாளித்தார்.

வைணவ திருத்தலங்களில் கொங்கு நாட்டில் சிறந்து விளங்கும் காரமடை அரங்கநாத சுவாமி கோவிலில் தட்சணாயன புண்ணியகால வைபவம் நடந்தது. அதிகாலையில் சுப்ரபாதம் திருப்பள்ளியெழுச்சி விஸ்வரூப தரிசனம் கோ தரிசனம் தொடர்ந்து மூலவர் ரங்கநாதருக்கு பால், தயிர், தேன், இளநீர், மஞ்சள், சந்தனம் திரவியங்கள் கலச தீர்த்தத்துடன் சிறப்பு அபிஷேகம் முடிந்து ஸ்ரீதேவி பூதேவி சமேத உற்சவர் ஸ்ரீ ரங்கநாதருக்கு சிறப்பு அலங்காரம் நடைபெற்றது. தொடர்ந்து கால சந்தி பூஜை சாற்று முறை சேவிக்கப்பட்டது. இந்த வைபவத்தில் ஸ்தலத்தார்கள் அர்ச்சகர்கள் திருக்கோவில் ஊழியர்கள் பக்தர்கள் என ஏராளமானோர் பங்கேற்றனர்.