சென்னை: தமிழக அரசு துறைகள் அறிமுகப்படுத்தி உள்ள, மொபைல் ஆப்ஸ்களில், தமிழக அரசின் கோபுர சின்னம் இடம் பெறாததற்கு, ஹிந்து அமைப்புகள் கடும் கண்டனம் தெரிவித்துள்ளன.

ஹிந்து தமிழர் கட்சி தலைவர் ராம ரவிக்குமார்: தமிழக அரசு போக்குவரத்து கழகம் மொபைல் ஆப்ஸ் லோகோ, தமிழக அரசின் முத்திரையான, ஸ்ரீவில்லிபுத்துார் ஆண்டாள் கோவில் கோபுரம் சின்னம் இல்லாமல், வாய்மையே வெல்லும் என்ற சிங்க முத்திரையுடன் வெளியாகி இருக்கிறது. ஹிந்து சமய அறநிலைய துறைக்கு, பிற மத வழிபாட்டு தல கோபுரம் போன்ற லோகோவை உருவாக்கி இருக்கின்றனர். திராவிட மாடல் அரசு என்று சொல்லக்கூடிய தமிழக அரசு, மெல்ல மெல்ல ஆண்டாள் கோவில் கோபுரத்தின் அடையாளத்தை அழித்து வருகிறதோ என்ற சந்தேகம் தோன்றுகிறது. ஹிந்து சமய அறநிலைய துறையை, தமிழர் சமய அறநிலைய துறை என்று மாற்ற வேண்டும். தமிழக அரசின் கோபுரம் சின்னத்தை மாற்ற வேண்டும் என, தி.மு.க., கூட்டணியில் அங்கம் வகிக்கும் சில கட்சிகள் கோரிக்கை வைக்கும் சூழலில், ஹிந்து மத அடையாள அழிப்பில், அரசு செயல்படுகிறதோ என்று எண்ணத் தோன்றுகிறது. இந்த வேலையை அரசு செய்ய வேண்டாம். உடனடியாக அரசு துறை மொபைல் ஆப்ஸ் லோகோவில், தமிழக அரசின் சின்னத்தை வைக்க வேண்டும். லோகோவை மாற்றிய அதிகாரிகள் மீது நடவடிக்கை எடுக்க வேண்டும். இவ்வாறு, அவர்கள் தெரிவித்துள்ளனர்.