சஷ்டியில் சூரனை சம்ஹாரம் செய்ததால் கந்த சஷ்டி என்று பெயர் ஏற்பட்டது. சஷ்டி விரதம் இருந்தால் குழந்தை பாக்கியம் உண்டாகும். இயற்கை சீற்றங்களிலில் இருந்து காக்க வல்லது கோவர்த்தன விரதம்.இன்று சந்திர தரிசனம் செய்வதால் ஆயுள் விருத்தி உண்டாகும். சஷ்டி 2ம் நாளான இன்று கந்தனை வணங்க நல்லதே நடக்கும்.

கோவர்த்தன விரதம்; இயற்கை சீற்றத்தால் ஒவ்வொரு ஆண்டும் உலகம் அடைகிற நஷ்டம் கொஞ்ச நஞ்சமல்ல. சமீபத்தில் தமிழகத்தையும் பூகம்பம் பயமுறுத்தி சென்று விட்டது. இதுவே சற்று அதிகமாக இருந்திருந்தால், நம் நிலையை சொல்லவே முடியாது! தெய்வ சிந்தனை குறைந்து போனது. அநியாயம் அதிகரித்தது கண்டு, பொறுமையின் சிகரமான பூமாதேவியே பொறுக்க மாட்டாமல், தன் வேதனையை வெளிப்படுத்தி விடுகிறாள். அந்த பூதேவியின் நாயகனான திருமாலை வழிபட்டால், இயற்கை சீற்றங்களின் பிடியில் இருந்து விடுதலை பெறலாம். அதற்காக அனுஷ்டிக்கப் படுவதே கோவர்த்தன விரதம்.

இந்த விரதம் மிகவும் எளிமையானது. காலை 6 மணிக்குள் நீராடி, "ஹரே கிருஷ்ண ஹரே கிருஷ்ண கிருஷ்ண கிருஷ்ண ஹரே ஹரே, ஹரே ராம ஹரே ராம ராம ராம ஹரே ஹரே என்ற பதினாறு அட்சர மந்திரத்தை முடிந்தவரை சொல்லிக் கொண்டிருக்க வேண்டும். அன்றைய தினம், முழுமையாக பட்டினி இருப்பது நல்லது. முடியாதவர்கள், நோயாளிகள், பால், பழம் மற்றும் கஞ்சி போன்ற எளிய உணவு வகைகளை எடுத்துக் கொள்ளலாம். மாலையில், பெருமாள் கோவிலுக்குச் சென்று, நெய்பண்டம் நைவேத்யம் செய்தோ, துளசிமாலை அணிவித்தோ, இயற்கை சீற்றங்களில் இருந்து பாதுகாக்கவும், போதுமான அளவு மழை பெய்யவும், விவசாயம் சிறப்பாக நடக்கவும் வேண்டிக் கொள்ள வேண்டும். மறுநாள் காலை, கிருஷ்ணர் படத்திற்கு நெய் பண்டம் நைவேத்யம் செய்து, குழந்தைகளுக்கு வழங்க வேண்டும். இவ்வாண்டு பெருமாளுக்குரிய சனிக்கிழமையில், இந்த விரதம் வருவது மிகச்சிறப்பு. எனவே, தவறாமல் இவ்விரதத்தை அனுஷ்டித்து, இயற்கை சீற்றத்தில் இருந்து நம்மை பாதுகாத்துக் கொள்வோம்.