திருமால், கிருஷ்ணாவ தாரம் எடுத்த போது அவருக்கு, "கோவர்த்தனன் என்ற பெயர் ஏற்படும் வகையில், ஒரு சம்பவம் நிகழ்ந்தது. மழைக்கடவுளான இந்திரனுக்கே, கோகுலத்தில் வசித்த ஆயர்கள் ஆண்டு தோறும் பூஜை செய்து வந்தனர். ஒருமுறை, அதற்குரிய ஏற்பாட்டை செய்தபோது, கிருஷ்ணர் அதைத் தடுத்தார். "இந்திரன் ஒரு தேவன் மட்டுமே. அவனுக்கு யாகபலனை ஏற்க மட்டுமே அதிகாரம் உண்டு. மழை தரும் அதிகாரம் இறைவனுக்கே! ஆனால், இந்திரன் அந்த அதிகாரத்தை கையில் எடுத்து ஆணவத்துடன் தவறாக பயன்படுத்துகிறான். நமக்கு மழை கிடைக்க காரணமாக இருப்பது இங்குள்ள மலையே. அந்த மலைக்கு நீங்கள் பூஜை செய்யுங்கள்... என்றார். ஆயர்களும், அவரது கட்டளையை ஏற்று, அவ்வாறே செய்தனர். இதையறிந்த இந்திரன் கோபத்துடன், மேகக் கூட்டங்களை அழைத்து, கோகுலத்தை வெள்ளத்தில் மூழ்கடிக்கும் வகையில், மழை கொட்ட ஆணையிட்டான். மேகங்களும் அவ்வாறே செய்ய, கோகுலத்தை வெள்ளம் சூழ்ந்தது. ஆயர்கள் தங்கள் பசுக்களுடன் கிருஷ்ணரை சரணடைந்தனர். கிருஷ்ணர் அந்த மலையை, தன் ஒற்றை விரலில் தாங்கி, அதன் கீழ் எல்லாரும் வந்து பத்திரமாக இருக்கும்படி கூறினார். ஆச்சரியப்பட்ட இந்திரன், கிருஷ்ணரை சரணடைந்து மன்னிப்பு கேட்டான். அந்த மலை, இடையர்களை காத்ததால், கோவர்த்தன மலை என்றும், அதைத் தாங்கிய கிருஷ்ணர், கோவர்த்தனன் என்றும் பெயர் பெற்றார். கோவர்த்தனர் என்ற சொல்லுக்கு, இடையர் (பசு மேய்ப்பவர்கள்) என்று பொருள். இந்த சொல்லுக்கு, சிங்கம் என்ற பொருளுண்டு. மக்களை இயற்கை சீற்றம் வாட்டிய போது, சிங்கமென சீறியெழுந்து வந்து காத்தார் கிருஷ்ணர். எனவே தான், கோவர்த்தன விரதத்தை அனைவரும் கடைபிடித்து, இயற்கை சீற்றங்களில் இருந்து பாதுகாப்பை தேட வேண்டும்.